OEKUSI, 19 outubru 2019 (TATOLI) – Diretór Jerál Servisu Saúde Rejiaun Administrativa Espesiál Oekusi Ambenu (RAEOA) Interinu, Marcos Seo, rekoñese sentru saúde Baoknana, sub rejiaun Nitibe, daudaun ne’e la funsiona, maibé garante sei sosa foun.
“Sentru saúde sira iha Oekusi tama kategoria nivel um, katak sentru saúde observasaun oras 24 atu refere mai ospitál referál, ne’e ninia rekursu iha másimu ho mínimu, tanba ne’e Baoknana prienxe hela kritéria”, Marcos hatán ba preokupasaun pesoál saúde Baoknana bainhira Tatoli halo konfirmasaun iha ninia servisu fatin, sesta ne’e.
Nia akresenta daudaun ne’e kestaun saúde iha rejiaun sufisiente hela. Tanba ministériu saúde iha planu nasionál ba rekursu umanu, halo kolokasaun hodi halo atendimentu ba pasiente sira sufisiente ho ninia kategoria ne’ebé la hanesan.
Nia esplika, tanba ambulánsia iha Baoknana la funsiona, ho atendimentu oras 24, ambulánsia iha kapitál rejiaun mak sei hatán kuandu pesoál saúde halo kontaktu hodi refere pasiente ba referál.
Marcos Seo mós realsa kritériu sentru saúde mak másimu médiku haat, mínimu rua. Tanba ne’e, rekursu umanu iha sentru saúde Baoknana sufisiente hodi atende observasaun ba pasiente durante oras 24 nia-laran.
“Agora importante maka fasilidade no rekursu umanu, lutu ne’e seidauk prioridade, no husu jestór sira atu buka rasik solusaun ba lutu”, Marcos aviza hodi hatán mós preokupasaun ba balasa sira ne’ebé halo movimentasaun ba área sentru saúde ne’e.
Tuir dadus sekretáriu rejionál saúde 2018 ne’ebé sita iha dokumentu Orsamentu Jerál Estadu (OJE) 2019 livru 3-C ba RAEOA-ZEESM; ospitál ida, sentru saúde haat, postu saúde 17, posku Sisca 18, hodi atende númeru populasaun 73,716.
Jornalista: Cipriano Colo
Editora: Rita Almeida
