DILI, 22 outubru 2019 (TATOLI) – Empreza Kaikobilari ne’ebé prodús xapa matríkula sei entrega ba Diresaun Nasionál Transporte no Terrestre (DNTT) iha fin outubru ne’e.
“Daudaun ne’e kompañia ne’ebé halo produsaun ba xapa matrikula sira kontinua halo no sei hatama xapa matríkula mai fin outubru”, Xefe Departamentu Rejistu Veíkulu DNTT, Nelson Martins, dehan ba Ajénsia Tatoli iha nia knaar fatin Balidi, ohin.
Nelson Martins hatutan tuir informasaun ne’ebé husi kompañia hato’o mai iha DNTT sira halo ona produsaun ba xapa matrikula balun no hakarak hatama ona, maibé husi parte lojístika Ministériu Transporte no Komunikasaun maka husu sira para halo produsaun hotu maka entrega.
“Produsaun hotu tiha maka foin hatama dala ida mai iha Diresaun Nasionál Transporte no Terrestre”, tenik.
Tanba ne’e, agora, kompañia esforsa hela hodi kontinua halo produsaun nune’e finál fulan ne’e, bele hatama mai ona no husi parte DNTT bele distribui ona ba motorista no kondutór sira.
Xapa matríkula orijinál ne’ebé daudaun kompañia halo ona produsaun hamutuk 22.000 (rihun 18 ba motór no rihun haat ba karreta).
Notísia relevante :DNTT Husu Empreza Kaikobilari Aselera Produsaun Xapa Matríkula
Kompañia Hahú Prodús Xapa Matríkula Orijinál Rihun 22
Jornalista : Natalino Costa
Editora : Maria Auxiliadora
