DILI, 23 outubru 2019 (TATOLI) – Diretór Jerál Komérsiu iha Ministériu Komérsiu Indústria no Ambiente (MCIA-sigla portugés) ho inisiál LS tenke ba hatán iha Tribunal Distritál Dili tanba deskonfia komete kazu korrupsaun pasiva.
Tuir akuzasaun Ministériu Públiku (MP) nian katak, iha 2016 to’o 2017, kompañia Faranek halo atividade mineraís la iha lisensa ambientál hosi MCIA no mós Ministériu Rekursu Naturaís no Mineraís. Durante tinan rua, kompañia Faranek la selu taxa arrendamentu ba estadu. Tanba ne’e, iha jéneru 2018, TDD emite mandadu buska no apreensaun ba iha rezidénsia kompañia nian.
Iha loron la apuradu, arguido LS ne’ebé akompaña mandadu apreensaun nota katak arguido CG nia pasaporte mós polisia prende hotu, tanba nee arguido LS telephone ba iha testemuña SL, hodi hateten katak, arguido LS bele fó fila fali arguido CG nia pasaporte, tanba nee testemuña informa ba iha arguido CG, no ikus mai sira nain tolu deside atu hasoru malu.
Tuir malu iha loron la apuradu, arguido CG no arguido LS inklui testemuña sira hasoru malu, arguido CG entrega osan ba iha testemuña nia konta hamutuk $500,00 maka foin entrega ba arguido LS, tanba arguido LS hatene katak sei iha nia kolega ida ne’ebé bele hasai fali pasaporte nee.
Liu tiha loron balu arguido LS telefone ba testemuña katak, se bele informa ba arguido CG bele fó tan osan $7,000.00 tanba iha kolega nain tolu maka bele fahe osan nee, maibé arguido CG hatán dehan, osan la iha. Osan ne’ebé arguido entrega ba iha arguido LS too agora la devolve ba iha arguido CG.
Ho nune’e MP akuza arguido LS nu’udar autór material ho forma konsumada ba krime korrupsaun pasiva ba aktu ilísitu ne’ebé previstu iha artigu 292, no arguido CG nu’udar autór ba krime korrupsaun ativa previstu iha artigu 294 hosi kódigu penal.
Liuhosi audiénsia julgamentu, ohin, iha TDD Juiz prezide Antonio Fonseca, deside adia hikas julgamentu ba kazu ne’e tanba arguido CG nu’udar empreza nia na’in no sidadania Xinés la marka prezensa no la iha justifikasaun ruma ba tribunal.
“Depois notifika arguido laiha konfirmasaun, no lakon hosi justisa sein iha justifikasaun ba tribunal, tanba ne’e fó arguido loron prazu 15 atu halo justifikasaun, kuandu nafatin laiha konfirmasaun mak arguido sei selu multa ba estadu,” afirma Juiz Antonio Fonseca.
Ministériu Públiku ho arguido nia defeza mós konkorda katak arguido tenke halo justifikasaun ba tribunal kona-ba nia atitude. Katak depois viola lei no halo investimentu ilegál hetan lukru ba arguido nia-an, halai sees hosi justisa, tanba ne’e mantein husu aplika sansaun multa.
Ho nune’e juiz prosesu deside hodi adia kazu nee ba fali iha loron 12 fulan Fevereiru 2020.
Audiénsia julgamentu nee preside hosi juiz Antonio Fonseca, Ministériu Públiku reprezenta hosi Prokuradór Rogerio Viegas, arguido hetan asisténsia legal hosi Defensor Públiku.
Jornalista : Domingos Piedade Freitas
Editór : Francisco Simões
