PTR Fó Pose ba Juiz Administradór Tolu
DILI, 24 outubru 2019 (TATOLI)-Prezidente Tribunal Rekursu (PTR), Deolindo dos Santos, ohin, ofisiálmente fó pose ba juiz administradór nain tolu kompostu hosi Juiz Administradór Baucau, José Gonçalves, Juiz Administradór Dili, Afonso Carmona ho Juiz Administradór Suai, José Maria de Araújo.
Reprezenta juiz administradór enposadu sira, Afonso Carmona nu’udar Juiz Administradór Dili hato’o agradese ba Prezidente Tribunal Rekursu ne’ebé mak fó fiar ba sira nain tolu hodi hala’o serbisu estadu nian iha area justisa.
“Ami prontu atu asegura serbisu justisa nian ba ema hotu hanesan no husu apoiu povu no autoridade justisa nian hotu,” hateten Afonso Carmona iha nia diskursu iha ámbitu serimónia tomada pose ne’ebé hala’o iha Tribunal Rekursu, Caicoli, Dili.
Hola parte iha serimónia nee Ministru Justisa, Manuel Cárceres da Costa, Komisáriu Komisaun Anti Korrupsaun, Sergio Hornay, Prezidente Asosiasaun Majistratura Timor-Leste, Antonino Gonçalves, juizés konselleiru iha Tribunal Rekursu, Advogadu, prokuradór sira, juizés ho konvidadu sira seluk tan.
Jornalista : Domingos Piedade Freitas
Editór : Francisco Simões
