DILI, 25 Outubru 2019 (TATOLI) – Xefe Departamentu Sinál no Tránzitu Diresaun Nasionál Transporte no Terrestre (DNTT), João Eugénio da Silva, husu ba motorista transporte públiku atu labele tula pasajeiru liu kapasidade karreta nian.
“Tenke tula tuir kapasidade karreta nian no tenke tau importánsia vida pasajeiru nia númeru um perante halo viajen”, dehan João Eugenio ba Ajénsia Tatoli iha nia knaar fatin Balidi, ohin.
Nia dehan la kleur tama ona ba iha loron finadu tanba ne’e husu motorista sira hodi halai kuidadu aan nune’e bele evita asidente.
“Tanba ne’e husu ita-nia konxiénsia atu halai kuidadu, matan moris no neon na’in”, katak.
Hodi salienta bainhira kondús karreta halai neineik, labele ansi aan nune’e prevene dezastre.
“Loron boot sira hanesan ne’e tenke kondús karreta ho velosidade neineik, labele ansi aan, ita halai neineik sei to’o iha fatin ne’e ita bá”, nia sujere.
Tuir João Eugenio, loron boot sira hanesan ne’e asidente sempre mosu, nune’e husu hotu-hotu (motorista no kondutór) nia kompriensaun atu labele halai lalais nune’e bele prevene asidente no susesu to’o iha fatin objetivu.
Notísia relevante : Ferias Loron Matebian, PNTL Husu Motorista “Matan Moris no Neon Na’in”
Jornalista : Natalino Costa
Editora : Maria Auxiliadora
