DILI, 28 outubru 2019 (TATOLI) – Diretór Sekretáriadu Grande Projetu (SGP), Crispim Fernandes, informa husi projetu 143 ne’ebé mak 98 iha kontratu ne’e, Governu selu ona projetu 70 husi 2018 to’o tinan ne’e ho orsamentu millaun $75,3.
“Iha OJE 2018 to’o tinan ne’e (2019), ita-nia Governu selu ona projetu ne’ebé iha kontratu hamutuk 70 ho orsamentu millaun $75,3 husi projetu 98 ne’ebé iha kontratu ona no sei kontinua selu tan 28 tanba nia orsamentu iha KAFI”, Diretór SGP ne’e afirma iha ámbitu audiénsia Orsamentu Jerál Estadu (OJE) 2020 ho Komisaun E no C iha plenária Parlamentu Nasionál, ohin.
Projetu 143, Diretór Grande Projetu dehan, istórikamente aprova iha Konsellu Administrasaun Fundu Infraestrutura (KAFI) iha 2017, no KAFI aprezenta iha Sétimu Governu, maibé la konsege no aprezenta fali iha OJE 2018 hetan duni aprovasaun iha Parlamentu Nasionál no promulga husi Prezidente Repúblika.
Nune’e, Diretór Crispim Fernandes friza iha 2018, Governu hahú selu projetu 98 husi 143 ne’ebé iha kontratu ne’e Governu aloka millaun $235 atu kontinua selu projetu hirak ne’ebé iha ona kontratu.
“Ita sei kontinua prosesa atu selu hotu projetu ne’ebé iha kontratu no sei finaliza iha tinan ne’e, hodi hein projetu 45 ne’ebé seidauk asina kontratu”, katak.
Ba projetu 45 ne’ebé seidauk asina iha kontratu, nia dehan sei iha avaliasaun husi parte Gabinete Primeiru-Ministru, maibé tuir prosesu tékniku ihe legalidade hotu atu halo pagamentu.
“Ha’u hanoin projetu 143 ne’e legál hotu tanba KAFI halo aprovasaun ba projetu ne’e no aprezenta lista hirak ne’e ba Konsellu Ministru no hetan aprovasaun husi Parlamentu Nasionál iha 2018 no hetan promulgasaun husi Prezidente Republika”, afirma.
Nia dehan, Prezidente Repúblika promulga ona orsamentu ba projetu 143 ne’e signifika kumpre ona regra ne’ebé Governu iha responsabilidade atu selu hotu.
Ministru Planeamentu no Investimentu Estratéjiku interinu, Hermenegildo Augusto Cabral ‘Agio Pereira’, reforsa projetu 143 ne’e iha legalidade atu Governu halo pagamentu tanba nia orsamentu hetan ona aprovasaun iha Parlamentu Nasionál no Prezidente Repúblika promulga ona iha 2018, maibé ba 45 ne’e mak sei hala’o verifikasaun hela.
“Maibé, nia prosesu ezekusaun mak ami hasoru difikuldade uitoan tanba presiza halo esforsu hodi kria ekipa hodi identifika projetu um pur um hodi apoia Primeiru -Ministru atu rezolve hotu projetu 143″, katak Agio Pereira.
Diretór Ajénsia Dezenvolvimentu (ADN), Samuel Marçal, dehan projetu 98 ne’e iha kontratu no hahú selu ona ne’e tanba ADN halo verifikasaun no hetan projetu fíziku, mak halo rekomendasaun atu halo pagamentu.
“Ba projetu 45 ne’ebé seidauk iha kontratu ne’e depende de’it ba desizaun polítika, maibé ami haree teknikamente laiha problema tanba orsamentu iha atu selu no projetu nia fíziku iha no balun atu tama ona ezekusaun 100% no balun sei iha prosesu finaliza hela”, relata.
Entretantu, Prezidente Bankada CNRT, Duarte Nunes, husu ba Governu atu kontinua selu projetu 143 ne’ebé iha ona progresu servisu ka ezekusaun fízika iha ona. “Tanba kompañia sira servisu no gasta ona nia osan ba projetu”, sujere.
Prezidente Komisaun E asuntu infraestrutura, Abel Pires, mós husu Governu atu kontinua tau atensaun séria ba projetu 143 ne’ebé konsege sai polémika iha públiku no agradese ba Governu hahú selu no kontinua selu.
Molok ne’e, Parlamentu Nasionál liuhusi pedidu Bankada FRETILIN submete rekerimentu inkéritu parlamentár atu estabelese Komisaun Inkéritu Parlamentár (KIP) ba projetu 143 ho montante osan millaun $345 ne’ebé KAFI aprova iha19 jullu 2017.
Notísia relevante : Governu Kontinua Selu Projetu 143
Jornalista : Florencio Miranda Ximenes
Editora : Maria Auxiliadora
