DILI, 28 outubru 2019 (TATOLI) – Karreta Foun ho marka Pajero Sport hamutuk 35, ba Deputadu foun V Lejizlatura sira to’o ona iha Parlamentu Nasionál (PN), segunda ne’e.
Karreta ne’e, tama iha verba Orsamentu Jerál Estadu (OJE) 2019 nian, ne’ebé kada karreta Ho folin $41.000.
Notísia Relevante: Kada Karreta ba Deputadu Folin Rihun $41
Sekretária Jerál PN, Cedelizia Faria dos Santos, asina ona termu entrega ho kompañia Timor Safari hodi kompañia ne’e bele entrega ba PN.
Cedelizia hateten, kompañia kumpre loron ne’ebé determina iha kontratu atu entrega.
“Ita simu ona ohin. Kompañia kumpre duni iha loron 45 nia laran no ohin kompañia entrega ona. Ba oin karreta ne’e sei entrega ba deputadu hamutuk 27 ne’ebé mak tinan ida resin ona sira uza karreta privadu, nune’e mós entrega ba deputadu na’in hirak maka durante ne’e uza karreta operasionál, hamutuk karreta 35”, dehan Cedelizia Faria ba jornalista sira iha resintu PN, segunda ne’e.
Antes ne’e, Deputada Bankada KHUNTO, Olinda Guterres, ezije karreta tanba difikulta sira-nia fiskalizasaun iha terrenu.
“Karreta ba ami deputadu foun bainhira maka to’o? tanba ami uza karreta privadu ba halo fiskalizasaun”, nia dehan.
Entretantu, Konsellu Administrasaun PN, asina ona kontratu ho kompañia iha 12 setembru 2019 no fó durasaun tempu ba loron 45 nia laran.
Jornalista : Evaristo Soares Martins
Editór: Xisto Freitas
