DILI, 28 outubru 2019 (TATOLI) – Sobrevivente Rezisténsia, Juveníl no Estudantíl preokupa ho falsifikasaun dokumentu veteranu ne’ebé oras ne’e sai mós polémika iha rai-laran.
Preokupasaun grupu hirak ne’e, hato’o liuhosi konferénsia imprensa ba komemorasaun loron mate Saudozu Sebastião Gomes iha tinan 28 liubá (28 outubru 1991), iha Igreja Motaél.
Notísia Relevante: Sekretariu Estadu Asuntu Kombatente Kontinua Verifika Dadus Veteranu
“Natureza rasik maka sei fó justifikasaun katak se maka luta no se maka la luta? no se maka halo no se maka la halo?”, tenik Sobrevivente Rezisténsia, Jorge Manuel de Araújo Serrano, segunda ne’e.
Tanba ne’e, grupu rezisténsia hirak ne’e depozita konfiansa tomak ba Sekretaria Estadu ba Asuntu Kombatente no Libertasaun Nasionál, ne’ebé realiza ona kongresu munisipál no fó ona pose ba estrutura iha munisípiu sira hodi prepara ba estabelesimentu Konsellu Veteranu atu bele rezolve problema veteranu sira.
“Ita espera katak, Komité 12 Novembru ho Prezidente, Gregório Saldanha no maluk sira hotu, sei buka atu fó nafatin informasaun ba buat hotu”, nia akresenta.
Notísia Relevante: Tinan 2020, Estrutura Konsellu Kombatente Libertasaun Nasionál Estabelisidu
Jorge mós fó hanoin katak, Timor-Leste ninia luta klandestina hetan ho akompañamentu husi organizasaun internasionál hanesan Cruz Vermella Internasionál, ne’ebé iha dadus kompletu kona-ba se maka luta no se maka sai dadur.
“Ha’u hanoin, neineik ita sei hetan dadus sira ne’e. Ha’u fiar katak organizasaun sira sei kontribui mós dadus atu bele justifika loloos kona-ba veteranu sira”, nia subliña.
Jornalista : Cipriano Colo
Editór: Xisto Freitas
