ERMERA, 05 novembru 2019 (TATOLI) – Iha setembru tinan ne’e, Komisaun Verifikasaun halo ona verifikasaun ba veteranu sira ne’ebé rejista ona dezde tinan 2009, ho totál hamutuk 124.600 iha territóriu tomak.
Prosesu verifikasaun ne’e la’o durante loron 326 nia laran hodi perkore territóriu nasionál.
Veteranu Zona Halili-Letefoho, Sub-Rejiaun Ermera, Adolfo Soares ‘Hatulaka’, hateten iha prosesu verifikasaun, komisaun presiza define loloos veteranu ninia moris fatin no hela fatin atuál.
“Komisaun fó naran bainhira veteranu ida halo rejistu iha Aileu maibé naran sai fali iha Letefoho tanba hanesan moris fatin, tanba hola feto iha Aileu (rezidénsia atuál). Tanba ne’e presiza define didi’ak atu vetaranu sira labele lakon sira ninia partisipasaun”, nia tenik ba Agência Tatoli, tersa ne’e.
Tuir nia, problema ne’e hanesan dezafíu tanba veteranu iha partisipasaun iha rede klandestina maibé tanba muda hela fatin bele difikulta iha prosesu verifikasaun.
Veteranu ne’e dehan tan, komisaun verifikasaun presiza haree didi’ak karik veteranu ida mai ho ninia sasin, presiza de’it rekomendasaun ka tenke mai ho sasin.
“Bainhira nia mai Letefoho tenke fó rekomendasaun husi fatin ne’ebé nia halo sebisu ba, atu iha ne’e bele hatene no ninia sasin mós bele mai. Tanba dalaruma ema mai iha ne’e ami la koñese no husu fali. Agora iha prosesu verifikasaun haree liu ba moris fatin”, nia akresenta.
Nia informa, totál lista veteranu, iha Munisípiu Ermera kuaze 20.000, inklui iha Postu Administrativu Letofoho hamutuk 3.000.
“Loron-loron komunidade mai haree no dalaruma sira husu informasaun. Naran sira mai taka iha ne’e husi nasionál ne’ebé rejistu husi 2009, enkuantu hosi 2003 kuaze ramata ona”, nia informa.
Hatulaka refere tan, iha prosesu verifikasaun maka komisaun sira sei husu informasaun ba kandidatu sira kona-ba istória ne’ebé justifika katak kandidatu sira hanesan veteranu.
“Ne’e hanesan kritéria ba komisaun tanba ne’e sira nia kompeténsia. Ami iha administrasaun submete ba taka lista ne’e. Maioria ita haree maibé tanba kandidatu barak demais ita labele justifika katak ema sira maka ne’e ka lae”, nia subliña.
Iha Letefoho, nia informa, iha veteranu hamutuk 1.000 resin maka simu pensaun veteranu, balun mate no balun sei moris.
Jornalista: Julia Chatarina
Editór: Xisto Freitas
