DILI, 11 novembru 2019 (TATOLI) – Tuir ajenda ne’ebé aprova ona iha enkontru líder bankada, iha kuarta (20/11) Parlamentu Nasionál (PN) sei hahú debate Orsamentu Jerál Estadu (OJE) 2020 ho montante biliaun $1.950 iha plenária.
“Kalendáriu ne’ebé aprova tiha ona katak loron 20 novembru hahú debate iha jeneralidade”, informa Prezidente Parlamentu Nasionál (PPN), Arão Noé de Jesus da Costa Amaral, hafoin reuniaun líder bankada iha PN, segunda ne’e.
Tuir Rejimentu Parlamentu, debate jeneralidade sei akontese durante loron tolu, hahú hosi 20, 21 no 22 novembru.
Nune’e, loron 25 novembru tama fali iha debate espesialidade no sei ramata iha 9 dezembru 2019.
Diskusaun iha faze espesialidade ne’e sei akontese durante loron 10.
“Iha loron 10 novembru, Komisaun C halo redasaun finál hafoin loron 11 bainhira redasaun prontu ona sei enkamiña ba Prezidente Repúblika”, akresenta Arão Noé.
Jornalista: Evaristo Soares Martins
Editór: Xisto Freitas
