DILI, 12 novembru 2019 (TATOLI)—Kompozitór Múzika rezisténsia “Hanoin Ha’u-Nia Belun”, Paulo Pereira dos Santos, hateten maske muzika ne’e seidauk dekreta maibé nia agradese ba Estadu no Governu tanba konsidera nu’uudar múzika ba “Um Minuto de Silêncio” ne’ebé hananu iha kada selebra loron boot nasionál sira.
Maestro Paulo Pereira hateten múzika “Hanoin Ha’u-Nia Belun” ne’ebé agora Estadu no Governu utiliza nu’udar múzika “Um Minuto de Silêncio” ne’e, loloos nia hakerek ba nia alin Duarte Pereira ne’ebé mós lakon iha Masakre 12 Novembru iha Semitériu Santa Cruz ne’ebé kuñesidu ho Masakre Santa Cruz ne’e.
”Múzika ne’e ha’u hakerek ba ha’u-nia alin Duarte Pereira ho ninia títulu orijin ne’e mak ‘Hanoin Ha’u-Nia Alin’. Agora, tanba Estadu no Governu utiliza múzika ne’e sai hanesan ‘Um Minuto de Silêncio’ entaun muda nia títulu sai ‘Hanoin Ha’u-Nia Belun’ ne’ebé sempre hananu iha loron boot nasionál sira,” dehan Paulo Pereira ba Ajénsia TATOLI liuhusi entrevista iha Komemorasaun Masakre Santa Cruz ba dala-28 iha semitériu Santa Cruz, tersa (12/11/2019).
Ho sentimentu triste, nia dehan, hanesan múziku laiha tan dalan seluk ba nia atu espresa ninia sentimentu triste sira ne’e liuhusi múzika mak nia bele apresia ninia triteza sira ne’e. Entaun, tuir nia, nia hakreke múzika ne’e ba nia alin ne’e, to’o loron ida nia muda ninia hanoin atu muda títulu orijinál husi múzika ne’e ba fali “Hanoin Ha’u-Nia Belun”.
Razaun, nia haktuir, dala barak iha família ida-nia laran atu konsidera malu nu’udar maun-alin ne’e difisil oituan. Maibé, nia dehan, konsidera malu nu’udar belun dala barak bele nakloke ba malu di’ak liután. Tanba iha asaun maun-alin nian dala barak la forte entaun kuandu halimar hamutuk, iha tempu sei hamutuk konsidera malu nu’udar belun
“Ha’u hananu múzika ne’e dala barak mesa-mesak de’it. Maibé, ikus mai ha’u koko lori múzika ne’e ba hananu iha Coro Santa Cecília, múzika ne’e hetan apresiasaun boot. No, ha’u lembra, dahuluk ami hananu múzika ne’e iha Aniversáriu FALINTIL nian iha Atelari-Laga-Baucau,” nia relenbra fali.
Fundadór Coro Santa Cecília ne’e hateten, maske múzika ne’e seidauk dekreta maibé ninia legalidade mak estadu uza ona hodi hananu nu’udar “Um Minuto de Silêncio”. Agora se ema hotu hananu hodi fó louvór ba eroi sira entaun pesoalemente ha’u kontente ona tanba bele kompeleta mehi sira ne’e.
“Purtantu, múzika ne’e ha’u halo iha 1998. Múzika ne’e hananu dahuluk iha aniversáriu FALINTIL nian iha Atelari iha tinan 1999,” nia informa.
Nia haktuir, múzika ne’e kuandu haree ba ninia ritmu no palavra sira ne’e, konsidera kompleta ona. Maibé agora depende ba ukun na’in sira tanba públiku simu ona múzika ne’e iha sira-nia fuan. Katak, realidade hatudu kada segunda-feira, iha eskola sira inklui funsionáriu públiku sira sempre hananu iha eventu isar bandeira.
“Ha’u haksolok tebes. Maibé seidauk dekreta ne’e mak sei hamosu hela dúvida. Purtantu, iha lejitimidade maske seidauk dekreta. Maibé Prezidente Repúblika rasik husu ona atu halo mudansa. Ne’eduni iha minutu silénsiu nia laran, hotu-hotu hakmatek depois ramata tiha mak foin hananu múzika ne’e,” nia dehan.
Maske ho idade sei nurak maibé Paulo Pereira iha ona talentu natureza ne’ebé makaas no metin iha ninia personalidade. Raan arte nian ne’ebé suli iha ninia isin-lolon nian ne’e, lori nia sai múziku ne’ebé kuñesidu iha Timor-Leste. Ho múzika no liuhusi múzika, nia hatene katak múzika mós bele liberta husi presaun psikolojia no bele lori sai ema ne’ebé hatene ukun rasik-aan no hatene ukun-aan.
Jornalista: Tomé Amado
Editór : Rafy Belo
