LIQUIÇÁ, 16 novembru 2019 (TATOLI) – Ministru Transporte no Komunikasaun (MTK), José Agostinho da Silva, hateten ahi ne’ebé mate iha Aeroportu Internasionál Nicolau Lobato, iha sábadu (16/11), konsege normaliza hikas no la implika ba aviaun atu aterra no semo (landing and take off).
“Ha’u orienta ona atubele tau atensaun maka’as ba ahi ne’ebé mate, oinsá maka haree asuntu ne’e ho di’ak atu fó solusaun, ikus mai iha solusaun imediatu no buat hotu konsege la’o normál iha aeroportu”, ministru ba jornalista sira iha ámbitu konferénsia Aliansa Mudansa ba Progresu (AMP) iha Tibar.
Ministru salienta jeradór ne’ebé sustenta durante ne’e maske iha difikuldade, maibé iha minutu balun nia laran, prezidente (Air Navigation Administration of Timor-Leste) ANATL fó solusaun no serbisu iha aeroportu hanesan baibain.
Governu konstitusionál Daualuk iha kompromisu no vontade tomak hodi estabelese ona ekipa interministeriál, ne’ebé kompostu hosi Ministériu Konsellu Ministru, Ministru Transporte no Komunikasaun, Ministru Negósiu Estranjeiru no Kooperasaun no Ministériu Finansa, atu dinamiza planu mestre ba konstrusaun aeroportu Dili.
“Ami-nia tékniku sira esforsu maka’as hodi haree oinsá maka dinamiza planu mestre ba konstrusaun Aeroportu Internasionál Dili. Oinsá maka ita bele iha kondisaun ne’ebé di’ak atubele fasilita no normaliza transporte aéreu ba tempu ne’ebé mai.
Nune’e mós, Ministériu Transporte no Komunikasaun liuhosi Autoridade Aviasaun Sivíl, oras ne’e serbisu maka’as oinsá maka bele estabelese apoiu serbisu aéreu ho nasaun sira viziña atubele normaliza movimentu transporte aéreu. Nune’e bele normaliza saida maka agora sai preokupasaun públiku, liuliu ba presu billete.
Jornalista : Zezito Silva
Editora : Maria Auxiliadora
