DILI, 19 novembru 2019 (TATOLI) – Prezidente Rejiaun Admistrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), José Luís Guterres ‘Lugu’, hasoru malu ho Sekretáriu Estadu Komunikasaun Sosiál, Merício Juvinal dos Reis ‘Akara’, hodi rona programa importante ne’ebé sei implementa ba territóriu tomak liga ho área komunikasaun sosiál durante mandatu.
“Ha’u mai hasoru malu ho Sekretáriu Estadu Komunikasaun Sosiál hodi rona programa ne’ebé sei implementa iha Timór laran tomak. Ha’u haksolok tebes iha reuniaun ne’e Sekretáriu Estadu aprezenta planu ne’ebé sei harii telivizaun dijital no sei tau mós kanál ida iha RAEOA”, tenik Lugu iha Palásiu Governu, tersa ne’e.
Nia dehan, kanál ne’ebé SEKOMS planu atu harii iha RAEOA atu promove lian Baikenu tanba nu’udar lian materna ne’ebé ko’alia mós iha nasaun viziñu Indonézia.
“Ida ne’e di’ak tebes tanba ita bele promove ita nia lian. Lian ita nia avó sira nia lian ne’ebé husik hela mai ita. Ami laran ksolok tebes simu informasaun ne’e” nia akresenta.
Alende ne’e, Lugu konvida Sekretáriu Estadu Akara hodi bele ba vizita RAEOA.
“Ita hatene katak ita nia rai ne’e agora hanesan rai ida de’it no Estadu ida de’it ne’ebé ita sei servisu hamutuk,” nia subliña.
Nune’e, nia dehan, tempu besik ekipa SEKOMS sei hala’o vizita kortezia ba RAEOA hamutuk ho ekipa tekníku sira atu halo servisu ruma, nune’e povu atoni sira bele asesu di’ak liután ba informasaun ne’ebé divulga sai hosi mídia públiku nian.
Jornalista: Hortençio Sanchez
Editór: Xisto Freitas
