DILI, 22 novembru 2019 (TATOLI)–Embaixadór Austrália mai Timor-Leste, Peter Roberts, ohin, hala’o enkontru ho Ministru Defeza no Ministru Interior, Filomeno Paixão de Jesus, hodi aprezenta formasaun integradu ba membru F-FDTL, PNTL ho Alfándega kona-ba ró nian.
Ministru Defeza Filomeno Paixão de Jesus, dehan, Austrália sei fasilita formasaun ba operasaun ró ba membru forsa rua no Alfándega no liña ministériu sira hodi halo kontrolu ba atividade peska ilegál ne’ebé akontese makas iha tasi Kosta Súl, Timor-Leste.
Foin lalais ne’e iha vizita servisu ba Austrália, Ministru Filomeno hasoru malu ho Ministru Interna Austrália, Hon Peter Dutton no Ministra Defeza Austrália Senator Honoráriu Linda Reynolds CSC hodi diskute ona kooperasaun servisu ne’e.
Daudaun ne’e governu diskute hela sistema kriasaun Autoridade Marítima, hodi garante seguransa iha Kosta Súl nian. Tanba ne’e Austrália disponivel ajuda formasaun kona-ba operasaun ró ba instituisaun relevante sira ne’ebé tama iha Autoridade Marítima hodi halo kontrolu servisu hamutuk.
“Ami diskute fila fali kooperasaun servisu ne’ebé ha’u halo hodi ba hasoru malu ho Ministru Interna Austrália, Hon Peter Dutton no Ministra Defeza Austrália Senatora, Onoráriu Linda Reynolds, hodi haree ba apoiu ne’ebé Australia sei halo hamutuk seguransa iha Kosta Súl. Agora ita forma hela Autoridade Marítima nune’e. Australia mai ko’alia para se ita la iha ró sira sei oferese ró hodi fó treinu ba ita F-FDTL, PNTL, Alfándega hodi ita halo patrulla hamutuk,” dehan Ministru Filomeno hafoin enkontru ho Embaixadór Peter iha Ministériu Defeza Fatuhada, Dili.
Governante ne’e hateten, nia parte haruka ona proposta Memorandum of Undertanding (MoU) ida ba Primeiru-Ministru, Taur Matan Ruak, karik iha posibilidade iha fulan dezembru, tinan ne ‘e, ekipa konjunta sei halo operasaun ba peska ilegál iha Kosta Súl.
Embaixadór Austrália Peters dehan, Austrália oferese tiha ona ró patrulla foun rua hodi tulun Timor-Leste para halo papél ativa ida ba ninia seguransa marítima.
Austrália sei apoia hodi fó treinamentu estensu ba mariñeiru lubun, apoiu infraestrutura, kombustivel no pesa, no mós kompromisu atu halo manutensaun ba períodu naruk.
Iha fatin hanesan, Ministru Defeza Filomeno hasoru malu mós ho Embaixadór Uniaun Europeia mai Timor-Leste, Andrew Jacobs, hodi diskute kona-ba apoiu Uniaun Europeia nian hodi halo reforma iha Instituisaun PNTL no formasaun ba funsionáriu ministériu defeza nian inklui membru F-FDTL ho PNTL.
Iha enkontru ne’e, Timor-Leste husu ba Uniaun Europeia atu ajuda halo reforma iha Komandu PNTL hodi hadi’a nia lei no regulamentu interna sira.
Jornalista : Eugénio Pereira
Editór : Francisco Simões
