DILI, 25 novembru 2019 (TATOLI) – Lista ne’ebé Partidu União Democrática Timorense (UDT) hatama ba Tribunál Rekursu (TR) molok tama iha Eleisaun Antesipada 2017, Sekretáriu Jerál Partidu, Francisco David Xavier Carlos, maka númeru rua, tanba ne’e iha posibilidade nia maka sei substitui matebian Deputadu Gilman Exposto iha Parlamentu Nasionál (PN).
“Tuir lista, ha’u mak segunda pessoa no ha’u maka sei substitui ninia fatin. Maibé ohin ami sei konsentra ba haree mate isin, no aban maka sei haree rezultadu. En-prinsípiu ha’u prontu atu substitui ninia fatin”, hateten Francisco iha mate uma Taibessi, ohin.
Notísia Relevante: Deputadu Gilman Exposto Hakotu Iis Iha HNGV
Maski nune’e, nia triste tanba UDT lakon figura importante ida-ne’ebé durante ne’e fó kontribuisaun maka’as ba partidu.
“Prontu, iha loron tolu ne’e nia laran sei iha diskusaun jeneralidade ba Orsamentu Jerál Estadu (OJE) 2020, ami-nia partidu lakon ami-nia ema prinsipál ida. Tuir loloos, ohin ba ko’alia kona-ba orsamentu, maibé prontu destinu to’o ona no Maromak bolu nia”, nia akresenta.
Deputadu Gilman hakotu iis iha loron dahuluk diskusaun no votasaun jeneralidade ba Orsamentu Jerál Estadu (OJE) 2020, ne’ebé sei akontese hahú ohin to’o 27 novembru no sei kontinua diskusaun espesialidade iha 29 novembru to’o ramata iha 12 dezembru, hafoin sei haruka redasaun finál ba Prezidente Repúblika iha loron 13 dezembru.
Kona-ba asuntu ne’e, Vise-Prezidente PN, Maria Angelina Lopes Sarmento, hateten ida-ne’e kompeténsia Partidu UDT nian atu deside, tanba UDT mós halo koligasaun ho Partidu Frenti-Mudança (FM).
“Parlamentu Nasionál hein simu karta husi bankada kona-ba substituisaun Deputadu Gilman Exposto dos Santos”, nia subliña.
Deputada Bankada PLP ne’e hatutan: “Lei eleitorál hateten katak deputadu ida-ne’ebé maka naran tama iha lista eleitu bainhira la disponível atu kontinua mandatu no rezigna-aan ka mate, bele substitui husi lista númeru segundu ne’ebé la eleitu”, hateten Angelina ba Agência Tatoli iha resintu PN, segunda ne’e.
Tuir Deputada ne’e, maski Partidu UDT no FM halo koligasaun maibé lei eleitorál mós hateten katak ema ne’ebé substitui, lista tenke mai husi partidu orijinál.
Jornalista : Cipriano Colo
Editór: Xisto Freitas
