AILEU, 26 novembru 2019 (TATOLI)-Komandante Polisía Munisípiu Aileu, Superintendenti Polísia Jorge Monteiro, hateten katak sei garante seguransa iha komemarasaun Loron Proklamasaun Independénsia ba dala 44 iha loron 28 novembru.
“Ha’u iha pensamentu pesoál ida katak garante ba komemorasaun loron proklamasaun independénsia iha Munisípiu Aileu ho apoia servisu komunidade no autoridade seguransa nian seguransa sei la’o ho di’ak”, hateten Komandante Jorge Monteiro ba TATOLI iha nia kna’ar fatin Aileu, ohin.
Iha komemorasaun 28 novembru ne´e, tuir Komandante Jorge Monteiro, hosi Komandu Munisípiu envolve estudante sira iha parada isar bandeira. “Ha’u hanoin joven sira komprende konteúdu ba komemorasaun loron importante ne’e, ne’ebé sei la akontese problema”, katak Jorge.
Lider másimu seguransa Aileu ne’e subliña katak, tanba komemorasaun ba 28 novembru ne’e hala’o mós iha postu administrativu sira maka komandu Polísia Aileu haree ba estratejia kona-ba planu seguransa nian maka mantein pesoál sira iha eskuadra no hamutuk ho komunidade hodi komemora loron istóriku ne’e.
Entretantu, Komandu Munisípiu Aileu lorloron treina estudante sira ba isar bandeira iha loron 28 novembru.
Jornalista: Antónia Gusmão.
Editór : Rafy Belo
