DILI, 27 novembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, konsidera veta Lei Fundu Petrolífera (LFP) lori impaktu ba investimentu empreza estatál Timor GAP.
“Impaktu ba kompañia Timor GAP, tanba nia presiza kapitál atu halo investimentu. Bainhira kapitál laiha, problema”, Arão Noé informa ba jornalista sira iha resintu Parlamentu Nasionál (PN), kuarta ne’e.
Notísia Relevante: Prezidente Repúblika Veta Lei Fundu Petrolíferu
PPN ko’alia asuntu ne’e, relasiona ho Prezidente Repúblika (PR), Francisco Guterres Lú Olo veta Dekretu Parlamentu Nasionál nº 11/V, alterasaun daruak ba Lei nº 9/2005, 3 Agostu, Lei Fundu Petrolíferu, tanba konsidera lejizladór sira hakarak fó dalan ba investimentu operasaun petrolífera, ne’ebé atu hetan valór persentu no reál ho persentajen aas liu investimentu seluk, maski investimentu seluk fó retornu finanseiru aas iha prazu badak ba Fundu Petrolíferu, garantidu no risku ki’ik.
Nune’e, Xefe Estadu deklara veta númeru 3 husi artigu 15ºA LFP, tanba haree artigu ne’e inkonstitusionál hasoru Konstituisaun, tuir akórdaun ho deklarasaun konjunta juíz tolu hosi Tribunál Rekursu.
Tuir Arão Noé, intensaun PN halo alterasaun ba artigu iha LFP ne’e tanba atu loke dalan ba kompañia Timor GAP atu halo investimentu.
Nia fó ezemplu, bainhira investidór ida mai investe maibé Timor GAP laiha kapitál, Timor-Leste bele lakon opurtunidade.
Deputadu Bankada CNRT ne’e informa tan, hafoin PR veta LFP, sei fila-fali ba PN Hodi halo apresiasaun.
“Tuir Konstituisaun no Rejimentu Parlamentu, iha loron 90 ba Parlamentu bainhira hakarak halo apresiasaun filafali, maibé tanba agora iha faze debate orsamentu, ami sei rai lai hafoin konklui aprovasaun Orsamentu 2020 nian maka sei tau fali ajenda ba asuntu ne’e”, nia akresenta.
Ba asuntu apresiasaun, nia esplika, Parlamentu iha opsaun tolu hanesan konfirma no haruka fila ba PR, halo alterasaun, ka bele mós lalika book tan lei ne’e.
Arão Noé subliña, opsaun tolu ne’e atu la’o ka lae depende ba desizaun plenária.
Nia akresenta, ba Lei Atividade Petrolífera (LAP) laiha problema tanba oras ne’e vigora no publika ona iha Jornál Repúblika.
Jornalista: Evaristo Soares Martins
Editór: Xisto Freitas
