MANATUTO, 02 dezembru 2019 (TATOLI)–Pároku Parókia Soibada, Pe. Tiago Soares da Costa, husu Governu atu hadi’a Colégio Soibada iha Postu Administrativu Soibada, Munisípiu Manatuto, ne’ebé to’o oras ne’e sei abandonadu tanba laiha orsamentu atu hadi’a.
“Ita harii ona nasaun tanba ne’e ema ida-idak tenke dezenvolve rai sira-ne’e, maibé ha’u husu de’it katak favor na’i-ulun sira, Estadu, no Governu Timor-Leste atu hadi’a netik colégio ne’e tanba la’ós propriedade Uma-Kreda ka Soibada ninian, maibé hanesan patrimóniu nasaun no igreja Timor-Leste nian”, Amu Tiago Ba Agência Tatoli iha ninia rezidénsia Soibada, segunda ne’e.
Nia dehan, dezde nia sai Amu Pároku to’o ohin loron colégio ne’e abandonadu.
“Agora ne’e ami la hetan dalan. Graças a Deus, iha tinan 2014 bainhira ha’u muda ba Soibada hodi sai Pároku maka ha’u halo proposta hodi reabilita igreja no rezidénsia maibé pakote tomak ba colégio feto no mane Soibada sei abandona to’o ohin loron”, nia informa.
Amu Tiago subliña, maski parte dioseze iha ona hanoin atu hadi’a maibé polítika Santa Sé ninia ho konkordata ne’ebé Governu implementa daudaun ne’e taka dalan ba prosesu.
“Iha verba ne’ebé aloka ba dioseze maibé la tama iha parte ida kona-ba edifísiu antigu sira. Tanba ne’e, ha’u husu atu ita-nia Governu no Estadu Timor-Leste hanoin atu tau verba ida ba patrimóniu nasionál ninian atu bele hadi’a no konserva edifísiu antigu sira nune’e bele sai patrimóniu nasionál ba nasaun”, nia akresenta.
Nia rekoñese, uluk iha Estadu Portugés nia tempu, colégio ne’e sai próprietáriu misionáriu sira-nian tomak atu halo serbisu no jere orsamentu mesak maibé ohin loron bainhira ukun-an, buat hotu tenke la’o tuir lei ne’ebé vigora.
“Planu iha maibé to’o agora dioseze mós laiha forsa atu bele hadi’a. Ema halo uma foun fásil liu duké nia atu hadi’a edifísiu antigu, tanba buat antigu ne’e dalaruma tenke la’o tuir konstrusaun antigu nian no labele halakon ninia estrutura antigu nian. Ida-ne’e mak sai problema”, Amu salienta.
Entretantu, iha loron 14 agostu 2015, Governu Timor-Leste no Santa Sé asina akordu ida ho objetivu atu implementa kuadru jurídiku relasaun entre Estadu Timor-Leste no Vatikanu.
Akordu ne’e ratifika liuhosi Rezolusaun Parlamentu Nasionál nú. 8/2015, 11 novembru, ne’ebé prevee kontribuisaun anuál hodi disponibiliza finanseiru Governu ba atividade sira ho karáter sosiál, edukativu no Governu Ekleziál Igreja Katólika.
Jornalista: Julia Chatarina
Editór: Xisto Freitas
