DILI, 04 dezembru 2019 (TATOLI) – Komisáriu Komisaun Anti Korrupsaun, Sergio Hornay, rejeita intervensaun polítika iha operasaun konjunta ba veikulu Estadu sira ne’ebé movimenta iha tempu ferias.
Ekipa hosi operasaun auto-stop ne’e kompostu hosi Polísia Nasionál Timor-Leste (PNTL), Diresaun Nasionál Patrimóniu Estadu (DNPE), Diresaun Nasionál Transporte e Terrestre (DNTT) no Komisaun Funsaun Públika (KFP), ho objetivu utiliza veikulu Estadu tuir regra sira.
“Intervensaun polítika, ha’u hanoin la loos, maibé iha nia tempu atu halo operasaun rutina ba funsionariu hirak ne’ebé lori karreta no motor Estadu la tuir nia regra”, tenik nia ba Tatoli bainhira partisipa semináriu kona-ba krime ekonómiku no finanseiru, iha edifísiu Ministériu Finansa, ohin.
Maske nune’e, nia afirma operasaun konjunta parte ida atu halo prevensaun no sensibilizasaun ba instituisaun Estadu sira atu kontinua fó hanoin ba malu oinsá jere patrimóniu Estadu tuir regra normal.
Tanba ne’e, nia husu ba ema hot-hotu atu koopera ho operasaun konjunta, atu buat hot-hotu la’o tuir nia-dalan.
Jornalista: Domingos Piedade Freitas
Editora: Rita Almeida
