DILI, 05 dezembru 2019 (TATOLI) – Advogadu privadu, José Camões, ohin, informa lider karismátiku, José Kay Rala Xanana Gusmão, sei ba Tribunál Distritál Dili (TDD) iha tuku 14.30 hodi presta deklarasaun nu’udar sasin ba kazu sosa karreta Prado Parlamentu Nasionál (PN) ne’ebé involve arguidu sira hanesan VG, JRA no FB iha 2008.
“Ohin, maun Xanana Gusmão sei presta deklarasaun iha tribunál kona-ba kazu karreta prado liliu ba arguidu ho inisial VG, JRA no FB, tanba iha 2008 kaer Governu hanesan Primeiru Ministru”, hatán nia ba TATOLI liuhusi rede sosiál whatsapp, ohin.
Nia dehan arguidu nain tolu Ministériu Públiku konsidera komete krime partisipasaun ekonómika no negósiu iha kódigu penál artigu 299 alínea 1 katak funsionariu ne’ebé tanba razaun husi ezersísiu kargu públiku, bele intervein iha kontratu ka operasaun ka atividade seluk, no aproveita iha situasaun rasik ka liu husi manu ain, hodi hetan vantajen patrimoniál ba nia án ka terseiru, ka husi kualker forma seluk, partisipa iha ekonomia ilísita, no modu ne’e bele hasusar interese públiku sira ne’ebé nia hala’o, administra, fiskaliza ka realiza, sei kondena ho pena prizaun husi tinan 1 to’o tinan 4.
Artigu 2 mak enkuantu husi hahalok interiór halakon Estadu superior husi dolar amerikanu 10.000 pena prizaun nian husi tinan 2 to’o 8.
Akuzasaun Ministériu Públiku
Akuzasaun Ministériu Públiku nian, hatete iha 2008, PN iha dotasaun orsamentál inisiál ida ba akizisaun veíkulu/karreta ho montante U$910,000.00.
Orsamentu ratifikativu aumenta ba US$1.400.000.00 (dolar Amerikanu Millaun atus ida-atus haat) ne’e ba dotasaun orsamentál ba karreta hamutuk USD$2,310,000.00 (osan dolar Amerikanu millaun atus rua, atus tolu sanulu).
Iha tinan 2018 prezidente parlamentu nasionál assume mos funsaun hanesan Prezidente Repúblika interinu, mak arguidu VG nu’udar vise prezidente no ezerse mos funsaun prezidente parlamentu Nasionál nian.
Iha loron 3 Marsu 2008 kompañia Midori Motors, aprezenta ba diretór nasionál PN nian kona-ba proposta akizisaun nian ida ba karreta 65 ho marka Toyota land Cruiser ho valor USD$ 2.171,000.00. no folin hosi kada karreta USD$ 33.400.00 (osan dolar amerikanu rihun tolunulu resin tolu, atus haat).
Tuir proposta ida ne’e pagamentu sei fahe ba prestasaun 2, primeiru prestasaun ho valór USD$910,000.00, tuir prestasaun ho valor USD$1,261,000.00 ne’ebé sei kobra hosi orsamentu rerifikativu 2008.
Iha loron 9 Abríl 2018, arguidu VG, fó sai despasu ho proposta ida ne’e iha termu sira hanesan, “hafoin analiza proposta barak ne’ebé aprezenta ona, ba prezidénsia meza PN nian, aseita proposta ida ne’e kona-ba produtu ho nia folin, ba sr. diretór nasionál atu dilijénsia hodi bele hetan ajustamentu direitu,”
Iha loron 10 Abríl tinan 2008 arguidu VG ho arguidu JRA asina justifikasaun ida kona-ba ajusta direitu ho komapañia Midori Motors, hodi alega katak sira halo tiha ona inspesaun merkadu nian ho kompara folin no karakterístika karreta sira nian, no kompañia ida ne’ebé mak aprezenta proposta. Justifikasaun ida ne’e haruka ba arguidu FB.
Iha loron 11, Abríl 2008 PN emite CPV númeru 8PR991154BCD no rekuza kompara nian ba akizisaun karreta Toyota Land Cruiser Prado 26, ho valor USD$ 910.000.00.
Iha loron 5 fulan Maiu 2008 arguidu VG informa ba Ministra Finansas, Emilia Pires, katak desizaun atu ho karreta ne’e, sira hola tiha ona hosi meza parlamentu nasionál nian hafoin konsulta tiha bankada hotu katak pagamentu sei halo iha prestasaun dala rua, primeiru ho valor USD$910.000.00 no segundu USD$1,261, 00 no sei selu ho verba ne’ebé sei inskreve iha orsamentu suplementár.
Iha loron 3 fulan Juñu 2018 halo hikas fali kontratu foun no númeru 84063 ho Ministériu Finansa no kompañia Midori Motors hodi halo finansiamentu ba karreta ho marka Toyota Land Cruiser Prado 27 ho valor USD$ 910.000.00, karreta hirak ne’e tenke entrega iha loron 30 fulan Juñu 2008.
No kontratu hirak ne’e asina iha loron 11 fulan Juñu 2008 hosi kompañia Midori Motors, Kim Jung Woo, ho Primeiru Ministru, Xanana Gusmão.
Hosi data ne’e depois emite tiha orden sosa nian númeru 84347 hodi Midori Motors nia naran, ba akizisaun karreta marka Toyota Land Cruizer Prado 27 katak iha data ne’e tenke entrega, maibé ida nee la aprova hosi ministra finansas.
Hosi aktu sira ne’e konsidera hamosu prejuizu boot ba osan estadu nian, katak loos duni artigu 37 hosi dekretu lei númeru 10/2005 loron 21 Novembru, hatete prosedimentu aprovizionamentu nian ne’e admitadu “ impoin mos konkursu públiku obrigatóriu ba akizisaun sira ho valor hanesan ka superior hosi U$100.000.
Ida ne’e konsidera katak nein sirkunstánsia ida hosi hirak ne’e arguidu sira laiha kompeténsia au aprova osan sira ho valor boot.
Arguidu sira viola prinsípiu transparénsia no publisidade nian ne’ebé obriga katak kritériu adjudikasaun nian tenke define loloos iha momentu interior hosi prosedimentu no sei hetan garantia informasaun ba interesadu sira.
Tanba ne’e ho arguidu sira nia hahalok arguidu sira pronunsia tiha benefísiu ilejítimu ida ba Midori Motors hosi hamosu prejuizu ba estadu pelumenus USD$ 400.00 mill kada karreta adkiridu, uma ves que iha data hanesan nova Breeding and Trading Unipesoal fornese karreta hanesan ho folin baratu liu USD$ 400.00.
Tanba ne’e ministériu públiku konsidera arguidu VG komete krime Partisipasaun Ekonomia iha negósiu artigu 299 KP, no artigu 2 lei Indonesia nian kontra korrupsaun.
Arguidu JBA, akuza mos ho krime hanesan, no arguidu FB, akuza mos ho krime hosi artigu 299 nian hotu iha kódigu penal Timor-Leste nian.
Jornalista: Domingos Piedade Freitas
Editora: Rita Almeida
Kazu Karreta Prado PN, Simu Orientasaun Hosi Saudozu La Sama
TDD Adia Hikas Kazu Vicente Guterres
Deskonfia, Emilia Pires “Kontribui” ba Kazu Sosa Karreta Prado PN
