iklan

HEADLINE, MANATUTO, MUNISÍPIU

Tum-Tum iha Manatuto Loron ida Bele Hetan Rendimentu $15 to’o $25

Tum-Tum iha Manatuto Loron ida Bele Hetan Rendimentu $15 to’o $25

Motorista Tum-Tum, José Marques Guterres, bainhira dadalia ho jornalista Agência Tatoli, iha estrada Manatuto Vila, kuarta (04/12). Imajen Tatoli/Joanico de Araújo

MANATUTO, 04 dezembru 2019 (TATOLI)–Motorista ne’ebé loroloron sempre hala’o operasaun ba mai ho ninia motór ojek ka Tum-Tum iha vila laran Munísipiu Manatuto, José Marques Guterres, hateten rendimentu ba loron ida depende ba estudante sira.

“Ami-nia atividade mak ida-ne’e. Kada loron ami halai bele hetan to’o $15, maibé bainhira sorte di’ak ami bele hetan to’o $25 hanesan ne’e. Maibé depende eskola-oan sira. Bainhira feriadu entaun ami la halai tanba komunidade sira sa’e menus. Só eskola-oan mak sa’e barak”, tenik José Marques ba Agência Tatoli, bainhira hala’o hela ninia atividade lori Tum-Tum, kuarta ne’e, iha Manatuto.

Nia dehan, kona-ba presu, ba komunidade baibain selu sentavu 50, enkuantu ba estudante selu sentavu 25, ba dirasaun dook no besik presu hanesan.

José Marques haktuir, antes ne’e ninia patraun mak sosa motór hodi fó ba nia halai hahú hosi tinan 2014, maibé iha tinan 2018, José deside hola ninia motór rasik hodi bele buka osan.

“Uluk ne’e, ha’u uza ema nia motór mak halai. Hafoin loro-kraik estór ba patraun no to’o fulan mak nia selu ha’u. Selu maibé depende hosi osan ne’ebé ha’u estór. Ho osan sira-ne’e hotu, ha’u tau hamutuk to’o 2018 mak ha’u hola rasik ha’u-nian atu halai”, nia akresenta.

Maski rai manas no kolen, José la baruk atu halai buka kliente tanba ida-ne’e hanesan nia atividade loroloron hodi buka osan rahun hodi bele sustenta família.

Jornalista: Hortençio Sanchez

Editór: Xisto Freitas

iklan
iklan

Leave a Reply

iklan
error: Content is protected !!