DILI, 16 dezembru 2019 (TATOLI) – Ministru Agrikultura no Peska (MAP), Joaquim José Gusmão dos Reis Martins, hateten ministériu sei intensifika (aumenta) bee iha Jaco hodi rusa sira bele hemu.
“Orsida, ha’u bolu diretór jerál florestál mai atu ami ko’alia, nune’e ohin ka aban MAP bele halo ona asaun ruma ba Jaco, maibé ida ne’e la’ós asaun dahuluk más ita intesifika liután”, ministru salienta ba Ajénsia TATOLI iha nia serbisu fatin, Comoro, ohin.
Antes ne’e, MAP halo intervensaun lubuk ida ona liuhosi ajudu Bombeiru no Sekretáriu Estadu Protesaun Sivíl nan hodi lori bee baá Jaco, maibé ida ne’e asaun limitada tebes, nune’e ministériu sei aloka orsamentu ruma hodi bele atende situasaun emerjénsia iha illa Jaco.
“Ha’u seidauk hatene totál orsamentu, maibé agora ha’u sei bolu parte finansa nian atu bele aloka osan ruma hodi ita atende ba situasaun emerjénsia”, afirma.
Ministru dehan maski públiku preokupa tebes ba serbisu ministériu nian, maibé MAP sei la hakmatek iha fatin, sei halo esforsu hotu atubele salva balada sira-nia vida maski balun mate ona.
Tanba ne’e, ministru husu ba ema hotu katak bainhira vizita Jaco karik bele lori bee litru lima atubele salva balada sira, nune’e husu mós ba parte relevante sira atu halo asaun ruma, nune’e bele rezolve situasaun rusa iha Jaco.
MAP sei Entrega Ró Ida ba Guarda Florestál
Ministru afirma katak iha tempu badak (2019) MAP sei entrega ró ida ba guarda florestál sira, atubele transporta bee bá Jaco ho diariamente.
Tuir ministru katak iha Jaco, ró peskadór sira-nian maka iha ne’ebá, entaun tempu badak MAP sei entrega ró ida ba guarda florestál hodi bele transporta bee bá Jaco no MAP sei aloka osan oituan ba situasaun emerjénsia hodi responde ba balada sira-nia sofrimentu ba bee no ai-han nian.
Entretantu, ró ne’e hanesan ró peskadór (ki’ik) ne’ebé halo iha Lospalos tanba ne’e tékniku MAP ni’an tun ona hodi haree, bainhira loos ona, maka iha semana ne’e nia-laran MAP entrega ona ba guarda florestál.
Jornalista : Zezito Silva
Editora : Maria Auxiliadora
