DILI, 17 dezembru 2019 (TATOLI)-Organizasaun naun governmental Asisténsia Legál ba Feto no Labarik (ALFELA) durante janeiru to’o dezembru, tinan ne’e, rejista kazu violasaun hasoru feto ho labarik iha territóriu Timor laran tomak hamutuk 452.
Diretór Ezekutivu ALFELA, António Marques relata, hosi númeru kazu ne’e maioria violénsia doméstika ho total kazu 219, tuir kedas violénsia ofensa bazeia ba jéneru (69), violasaun seksuál (50), abuzu sexuál hasoru labarik minoridade (40) no sira seluk tan ho númeru natoon.
“Kazu sira ne’e nia prosesu ba hotu ona iha Ministériu Públiku no balun iha ona tribunál hodi halo julgamentu,” informa António Marques, hodi responde Ajénsia TATOLI, ohin, iha nia servisu fatin, Vila Verde, Dili.
Nia hateten, kazu sira ne’e akontese tanba fatór falta konsiénsia hosi autór sira rasik, falta morál, edukasaun mínimu no mós balun hosi fen ho lain dalaruma deside forma uma-kain laiha servisu (dezempregu).
ALFELA iha papél importante hodi fó akompañamentu asisténsia legál ba vítima sira, iha prosesu justisa hosi inísiu to’o termina.
António Marques afirma, hanesan organizasaun sosiedade sivíl hala’o kna’ar importante tebes hodi kontribui ba dezenvolvimentu Timor-Leste. Tanba ne’e, ALFELA iha kompromisu luta hasoru violénsia no kontinua hala’o advokasia, sensibilizasaun ba programa edukasaun hasa’e konsiénsia públiku hakribi violénsia ba komunidade ein-jerál, estudante ho autoridade lokál.
Jornalista : Nelson de Sousa
Editór : Francisco Simões
