DILI, 23 dezembru 2019 (TATOLI) – Xefe Departementu Sinál no Tránzitu Diresaun Nasionál Transporte Terrestre ( DNTT), João Eugénio da Silva, husu ba motorista sira atu halai ho neineik bainhira kondús karreta no motór.
“Agora daudaun ita tama ona ba Natál no tinan-foun, tanba ne’e ami kontinua husu ba kolega motorista atu halai ne8neik bainhira kondús karreta no motór, tenke atensaun no ho konxiénsia atu nune’e bele prevene asidente tráfegu”, dehan nia ba Ajénsia TATOLI iha Balidi, ohin.
Nune’e mós motorista sira tenke respeita nafatin lei kódigu estrada tanba ida ne’e sai ona matadalan ba sira, no mós ema la’o-ain sira mós tenke kumpre.
Nia husu mós ba kondutór sira atu labele lanu bainhira lori karreta no motór tanba asidente ne’e la espera, entaun tenke prevene.
Jornalista : Natalino Costa
Editora : Maria Auxiliadora
