DILI, 23 dezembru 2019 (TATOLI) – Ministru Ensinu Superiór, Siénsia no Kultura, Longuinhos dos Santos hateten katak estabelesimentu ensinu superior sira, tantu públiku ka privadu, iha tratamentu ne’ebé hanesan husi Ministériu Ensinu Superiór, Siénsia no Kultura (MESSK) tanba mesak timoroan nian de’it, ne’ebé nu’udar jerasaun foun no future Timor-Leste (TL) nian.
“Ita seidauk hili Institutu Ensinu Superiór Públiku mak di’ak liu Institutu privadu sira. Ita halo tratamentu iguál ka hanesan to’o agora. Katak, laiha anak tiri iha MESSK nia matan tanba sira ne’e mesak timoroan de’it ne’ebé nu’udar jerasaun foun ba futuru rai ida ne’e nian,” dehan Ministru Longuinhos dos Santos ba Agência TATOLI, iha CCD (Sentru Konvensaun Dili, sigla portugés), ohin.
Governante ne’e informa, iha tinan ne’e, MESSK presta atensaun maka’as liubá Institutu Ensinu Superiór Privadu (IESP) tanba universidade públika, otomatikamente, iha ninia orsamentu mai husi governu.
Tanba ne’e, governu hakarak konsentra mós ba IESP sira liu husi transferénsia públika. MESSK hakarak aselera grau akadémika ba IESP ne’ebé kada tinan sempre oferese.
“Ita mós halo akordu kooperasaun ho profesór sira husi Portugal hodi oferese ba Institutu Ensinu Superiór Privadu atu hasa’e no kapasita formasaun lian portugés ba dosente sira”.
Polítika nasionál MESSK nian, tuir Ministru Longuinhos dos Santos mak oinsá atu hasa’e kualidade iha grau akadémiku ba doesente sira ne’ebé mak sei hanorin ho nível lisensiatura.
Notísia relevante: MESSK-Konsellu Reitór Ko´alia Polítika Nasionál MESSK ba Tinan 2020
Jornalista : Tomé Amado
Editór : Rafy Belo
