DILI, 06 janeiru 2020 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL) Major Jenerál Lere Anan Timur, preokupa no lamenta tebes ho atitude juventude sira balun ne’ebé tula liman ba membru F-FDTL ho PNTL sira.
Notísia Relevante : Ema Sona Membru F-FDTL Na’in Ida iha Tasi-tolu
“Ha’u hanoin komunidade, liuliu joven sira ne’ebé mak baku seguransa sira hanesan membru PNTL no F-FDTL konsidera la iha moral,” afirma Lere Anan Timur, ba jornalista sira, bainhira partisipa avaliasaun servisu PNTL no F-FDTL nian hamutuk ho Ministru Ministériu Defeza no Ministru Interiór interinu, Filomeno da Paixão de Jesus, iha salaun Xanana Gusmão, Ministériu Finansa, Ai-tarak Laran, segunda (06/01/2020).
Lere esplika, tuir loloos komunidade tenke respeita membru PNTL no F-FDTL sira, tanba sira hala’o servisu Estadu nian hanesan halo seguransa iha kualkér momentu, atu povu hot-hotu hakmatek hodi hala’o atividade diária hanesan bain-bain.
Maske nune’e, nia parte mós apela ba iha parte seguransa sira, liuliu forsa atu koloka ninia-an hanesan instituisaun nia ema iha sirkunstánsia hot-hotu hanesan la bele lanu iha fatin públiku, labele sadik ema arbiru de’it no seluk-seluk tan.
“Agora, se ita nia populasaun seguransa di’ak liu lalika baku, se lae to’o momentu komandante ne’ebé mak bulak dalaruma haruka imi baku malu, tanba iha Timor ema ida la tahan forsa maske la lori kilat,” tenik Lere Anan Timur.
Jornalista : Domingos Piedade Freitas
Editór : Francisco Simões
