DILI, 07 janeiru 2020 (TATOLI) – Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, informa iha proposta Orsamentu Jerál Estadu (OJE) 2020 ne’e, MTKI prevee rihun $555 atu hala’o planu mestre (master plan) hodi fó prioridade ba sítiu turístiku sira ne’ebé sai ikóniku (símbolu) munisípiu sira.
Planu prioridade ba sítiu turístika sira ne’ebé sai ikóniku munisípiu sira ne’e bazeia ba Planu Estratéjiku Dezenvolvimentu Nasionál (PEDN) 2011 to’o 2030.
“Ba hala’o master plan ne’e, MTKI propoin millaun $1,5 maibé hetan redusaun ba de’it pur-volta rihun $555, ita sei foka de’it ba planu mestre sai icon iha munisípiu sira”, José Filipe Dias Quintas ba jornalista sira iha Parlamentu Nasionál, ohin.
Nia dehan iha OJE 2020 no planu mestre ne’e, sei foka liu ba sítiu turístika sira ne’ebé sai ikóniku iha parte leste, sentrál no oeste hodi bele dezenvolve atu atrai turista sira.
José Quintas afirma sítiu ikóniku ne’e iha parte leste sei fó prioridade ba Parke Nasionál Nino Konis Santana liuliu illa Jaco no foho Matebian, parte sentrál Kristu Rei no Oeste foho Ramelau, no sítiu balun iha Munisípiu Covalima no seluk tan.
Nia adianta planu mestre ne’e, planu integradu ida hodi haree ba impaktu ambientál, sosiál no ekonómiku hodi dezenvolve no hadi’a infraestrutura sítiu turístiku sira ne’e.
“Ita ko’alia dezenvolvimentu turizmu sustentavel, ita presiza dezenvolve fazeadamente tanba ita-nia kapasidade finanseira limitada ne’ebé susar atu dezenvolve iha tempu hanesan”, katak.
Nia salienta iha 2020, fó prioridade dahuluk ba sítiu turístiku ikóniku sira no tuir fali ba turizmu istóriku, relijiozu, dezenvolve fatin kultura no seluk tan.
“Maibé, ita presiza kategoriza tanba sítiu ne’e barak lahalimar, ita tenke foka ba nia icon hanesan munisípiu Lautem, iha Ainaro se mak la koñese Ramelau, iha Baukau mak Matebian no iha Dili mak Kristu Rei, ne’e se mak la koñese, entaun ne’e mak ita presiza dezenvolve uluk pois fazeadamente ita book fali sítiu médiu to’o ki’ikoan sira”, afirma.
Oitavu Governu Konstitusionál fó prioridade makaas ba setór turizmu tanba rekoñese katak setór ne’e importante tebes ba ekonomia Timor-Leste nian hodi bele hamenus dependénsia ba setór mina-rai.
Notísia relevante : 2020, MTKI Prioritiza Sítiu Turístiku Ne’ebé Sai Ikóniku Munisípiu Nian
Nune’e, nia dehan setór ne’e estratéjiku ba Timor Leste, ne’ebé iha 2020 foka liu ba setór turístiku tanba realidade sítiu sira iha munisípiu abandonadu tanba laiha orsamentu no bainhira Governu dezenvolve, nia dehan, presiza mós halo jestaun atu sítiu sira ne’e ho di’ak.
“Ita presiza halo jestaun no husu públiku mós tenke kontribui hodi sai hanesan parte husi solusaun, la’ós Governu hadi’a tiha, públiku rasik laiha konxiénsia ba estraga no soe lixu arbiru”, sujere.
Aléinde ne’e, MTKI mós kontinua promove turizmu kruzeiru tanba tinan-tinan ró kruzeiru mai iha Timor-Leste lori mós turista sira mai vizita sítiu turístiku ne’ebé naturál, kultura, relijiaun no istória inklui seguru hodi fó rendimentu ekonómiku ba povu.
Polítika Oitavu Governu Konstitusionál liuhusi Konsellu Ministru aprova ona hodi estabelese komisaun interministeriál atu dezenvolvimentu setór turizmu iha Timor-Leste atubele fó apoiu ba dezenvolvimentu setór turizmu liuliu infrastrutura bázika, konetividade, presu aviaun no vistu atubele dada turista sira mai Timor-Leste.
Notísia relevante : Sei Halo Planu Mestre ba Setór Turizmu Hodi Kontribui ba Ekonomia
Jornalista : Florencio Miranda Ximenes
Editora : Maria Auxiliadora
