DILI, 15 janeiru 2020 (TATOLI) – Governu Timor-Leste (TL) liuhusi Ministru Transporte no Komunikasaun, José Agostinho da Silva, no Vise-Ministru Negósiu Estranjeiru Asuntu Parlamentár husi Japaun, Norihiro Nakayama, ohin, inaugura realokasaun terminál ró iha Portu Dili.
Antes inaugura realokasaun terminál ró ne’e, hahú uluk ho serimónia rituál ka kulturál husi lia-na’in Karketu Motael hodi husu bei-ala no Na’i-Maromak atu fó matak-malirin no akompaña atividade sira ne’ebé sei la’o hela iha terminal ró ne’e.
Lia-na’in husi Karketu Motael, Pio Ataide, hateten iha rituál ne’e hatudu sinál di’ak no hatudu Governu Japaun ajuda ne’e ho valór aas tebes no apoia ho laran.
“Japaun nia orsamentu ne’ebé fó ita mós la saugati de’it, fahi aten ne’e hatudu sinál di’ak tebes no matebian no bei-ala sira no uma-ahi ne’ebé fó matak-malirin ba servisu hotu iha portu ne’e”, nia hatete iha Portu Dili.
Terminál ró ne’e tau fatuk dahuluk iha 8 agostu 2017 husi Governu Timor-Leste no hetan apoia finanseira husi Governu Japaun ho montante ¥2.197 (maizumenus millaun $21) no Governu Timor-Leste mós aloka osan millaun $1,147,700.
Projetu realokasaun terminál ferry ne’e, konstrui hosi Tobishima Corporation no hetan supervizaun husi joint venture (konsórsiu) Ides Inc. and Japan Port Consultants, Ltd, ho durasaun konstrusaun hahú iha 6 jullu 2017 to’o 31 marsu 2019.
Terminál ró ne’e ho naruk metru 100 ho luan metru 20, ne’ebé bele akomoda ró rua durante oras 24 nia laran ho andár ida no bele akomoda ema na’in-300, asesu dalan ho medida metru 55×52, ekipamentu nesesáriu sira seluk hanesan iluminasaun, fornesimentu bee, enerjia, torneira hamate ahi, no ekipamentu ba seguransa.
Antes ne’e, Prezidente Konsellu Administrasaun Autoridade Portuária Timor-Leste (APORTIL), Flávio Cardoso Neves, hateten prosesu inaugurasaun realokasaun terminál ró iha Portu Dili atu entrega ofisiál ba Governu Timor-Leste realiza, ohin, 15 janeiru.
“Ami halo preparasaun ho di’ak atubele hato’o agradesimentu ba Governu Japaun”, katak.
Governu Timor-Leste tenke prepara prosesu ho di’ak tanba Japaun tulun ona Timor-Leste, nune’e tenke simu ho di’ak no hatudu katak eventu ba prosesu konstrusaun hotu ona no ofisialmente sira entrega mai iha Governu Timor- Leste, liuliu mai iha APORTIL atu jere.
Hafoin inaugurasaun ba realokasaun terminál ró ne’e, bele funsiona ho di’ak atu ró Nakroma no ró seluk bele halo ona operasaun.
Jornalista : Florencio Miranda Ximenes
Editora : Maria Auxiliadora
