DILI, 15 janeiru 2020 (TATOLI) – Judicial System Monitoring and Programe (JSMP), apresia ho servisu Tribunal movel hodi hala’o julgamentu iha munisípiu sira.
Notísia Relevante : Konsellu Koordenasaun Justisa Reformula Tribunál Movel
“Iha tinan 2020, Tribunal sira reativa fali julgamentu movel nu’udar meiu ida, hodi hakbesik di’ak liu tan justisa ba povu, liuliu ba kbiit laek sira,” hateten Adjunta Diretora JSMP, Ana Paula Marçal ba Agência TATOLI, ohin, iha nia kna’ar fatin, Colmera, Dili.
JSMP mós apresia ho tribunal Oe-Cusse tanba ba dahuluk halo julgamentu movel iha tinan 2020, inklui julgamentu movel iha Baucau ho Suai.
JSMP konsidera programa ida-ne’e nu’udar aproximasaun di’ak tebes atu fasilita komunidade sira ne’ebé hela dook ka hela iha área rural bele asesu ba justisa formal.
JSMP nafatin rekomenda ba iha tribunal sira atu kontinua realiza programa tribunál movel to’o iha area rurál sira.
Tribunal Rejista Kazu Violénsia Doméstika 343
Tuir observasaun JSMP nian durante tinan 2019 ba kazu sira ne’ebé hala’o julgamentu iha Tribunal maioria kazu violénsia doméstika ho total 343.
Iha mós kazu sivíl 11 no ofensa fízika, inklui violénsia seksuál mak julga iha Tribunal ho prosesu no atendimentu ida di’ak tebes to’o hasai kondenasaun pena efetivu ba arguido sira.
Tuir JSMP nia observasaun katak iha kazu balun desizaun la adekuadu, fasilidade menus iha tribunal.
Maibé, iha fulan hirak antes remata 2019, tribunal fornese ona fasilitadór balun ba iha tribunal sira.
Notísia Relevante : JSMP Konsidera PN iha Vontade Finaliza LAK Maski Presiza Tempu
Jornalista : Domingos Piedade Freitas
Editór : Francisco Simões
