DILI, 16 janeiru 2020 (TATOLI) – Tribunal Distritál Dili (TDD), ohin, adia hikas alegasaun final ba kazu omisídiu agravadu Kuluhun ba fali loron 07 fevereiru 2020.
Notísia Relevante : MP Konklui Ona Akuzasaun Kazu Kulu-hun
Iha kontinuasaun julgamentu ba kazu Kuluhun ne’ebé envolve autór ka arguido nain rua nu’udar membru Polisia Nasional Timor-Leste (PNTL) ne’e rona depoimentu husi testemuña espesialista Siro-logia ne’ebé mak atende pasiente nain tolu ne’ebé sofre bala musan iha isin lolon no membru PNTL serbisu Forensik ne’ebé mak rekolla sasán iha fatin akontesimentu.
Iha depoimentu testemuña MSA informa nu’udar médiku ida serbisu iha Hospital Nasional Guido Valadares (HNGV), departamentu Siro-logia atende no halo relatóriu kona-ba pasiente nain tolu ne’ebé mak kona bala musan no kauza mate, rua seluk iha de’it sala emerjénsia.
Notísia Relevante : Kazu Kuluhun, PR Kondena Oknum Polisia Tanba Atua Fora de Regra
“Iha sala operasaun hetan katak pasiente hetan bala musan, pasiente Terezinha Vila Nova bala musan kona liman no pasiente Pinto Gama hetan bala musan ida no iha isin lolon hela, no Lucio do Carmo mós hetan hetan bala musan ida iha isin lolon no konsege hasai duni bala musan,” nia tenik.
Oras ne’e daudaun sira nain tolu moris hotu, maibé Terezinha mak aleza iha liman, Pinto Gama ne’ebé mak bala musan iha liman, la kauza infeksau seluk, no Lucio do Carmo mós bala musan iha isin, hala’o atividade di’ak hela.
Notísia Relevante : Governu Hato’o Sentidu Kondolénsias Família Matebian Iha Kuluhun
Testemuña seluk husi Unidade Forensik PNTL, informa, iha fatin akontesimentu rekolla sasán hanesan pistola 4, maksin pistola 4, hetan bala musan 10, lata mamuk tua hodi entrega ba Ministériu Saúde.
Audiénsia julgamentu ne’e, prezide husi juiz Srybuana da Costa, Edite Palmira, juiz estaziadu, Ministériu Públiku reprezenta husi prokuradór Jacinto Babo, arguido nain rua hetan asisténsia legal husi advogadu Pedro Aparicio no defensór públiku, Eustáquio Guterres.
Notísia Relevante : PN Apresia Família Vítima Kuluhun Koopera Ho Estadu
Jornalista : Domingos Piedade Freitas
Editór : Francisco Simões
