DILI, 16 janeiru 2020 (TATOLI) – Ministériu Finansa (MF) prevee verba iha proposta Orsamentu Jerál Estadu (OJE) 2020 ho valór millaun $4 hodi sosa ekipamentu teknolojia informasaun (IT) no mákina raiu-xís.
Diretór Jerál Autoridade Aduaneira (AA/Alfándega), José Antonio Fátima Abílio, hateten osan ne’ebé aloka sei sosa mákina ne’e tanba ekipamentu sira ne’e balu kondisaun hadi’a tiha aat fali, nune’e afeta ba kontrolu iha fronteira sira.
“Osan ne’ebé prevee klaru katak hanesan meiu ida para ajuda servisu Alfándega nia, tanba mákina raiu-xís iha Batugadé avaria beibeik, ne’ebé tempu ona atu sosa foun, no sira ne’ebé uluk sei manuál agora ita buka ida ne’ebé dijitál, multi dimensaun para haree hosi parte hotu”, Diretór Jerál ba TATOLI iha Parlamentu Nasionál, ohin.
Tuir planu mákina sei sosa dijitál, nune’e bele deteta ai-moruk kímiku sira.
“Seidauk hatene atu sosa, tanba depende ba montante osan ne’ebé sei aprova. Hakarak sosa raiu-xís gantry ida no hand carry, nune’e ajuda iha fronteira sira, aeroportu no portu”, katak.
Notísia relevante : Presiza Investe Ba Fasilidade Alfándega Hodi Apoia Servisu
Jornalista : Antónia Gusmão
Editora : Maria Auxiliadora
