DILI, 20 janeiru 2020 (TATOLI) – Tribunal Distritál Dili (TDD), ohin, foti desizaun final hodi absolve arguido eis Prezidente Parlamentu Nasional (PPN), Vicente Guterres, husi akuzasaun Ministériu Públiku kona-ba kazu partisipasaun ekonomia no indemnizasaun sivíl iha prosesu sosa karreta prado ba membru PN sira iha tinan 2008.
Notísia Relevante : Kazu Karreta Prado PN, Simu Orientasaun Hosi Saudozu La Sama
Tribunal Distritál Dili, liuhusi desizaun juiz António Fonseca, absolve mós arguido na’in rua seluk, mak hanesan, João Rui Amaral, nu’udar eis Sekretariu Jerál PN ho Francisco Soares “Borlaku” nu’udar eis Diretór Nasionál Aprovizionamentu Ministériu Finansa (MF).
Iha audiénsia julgamentu ikus ba prosesu kazu ne’ebé envolve arguido prinsipál na’in tolu ne’e, asiste diretamente husi lider karizmátiku atuál Prezidente Partidu Congreso Naçional Reconstrução Timorense (CNRT), Kay Rala Xanana Gusmão, ho mós Premiadu Nobel ba Pás nian, José Ramos Horta.
Notísia Relevante : Deskonfia, Emilia Pires “Kontribui” ba Kazu Sosa Karreta Prado PN
“Ha’u hanoin razaun husi TDD absolve arguido nain tolu mak hanesan kona ba proposta alterasaun karreta husi Prado ba Mitsubishi husi kompañia Midori, la’ós husi arguido nian tolu. Segundu, desizaun tomak iha Prezidente Parlamentu Nasional, Saudozu Fernando La Sama de Araújo nia liman. Terseiru arguido sira la hetan oferta ruma husi kompañia Midori. Atu dehan de’it katak, arguido nain tolu la envolve direita iha aprovasaun no halo desizaun sira nee, maibé fasilita de’it prosesu dokumentu sosa karreta ba deputadu sira ne’ebé mak momentu ne’ebá balun la iha karreta,” esklarese juiz singular António Fonseca iha audiénsia julgamentu ne’e iha Tribunal Distritál Dili (TDD).
Razaun seluk hodi fundamenta desizaun Tribunal nian absolve arguido sira tanba testemuña ne’ebé arrola husi Ministériu Públiku kuaze la iha provas sufisiente ruma hasoru arguido nian tolu, liuliu depoimentu husi deklarasaun testemuña prova katak la iha provas ruma hodi kondena sira ba pena prizaun, liuliu Xanana Gusmão ne’ebé mak akompaña prosesu katak nia mak asina duni momentu ne’ebá, bainhira asume kargu hanesan Primeiru-Ministru.
Notísia Relevante : Ohin, Xanana Sai Sasin Ba Kazu Kareta Prado
“Ha’u hanoin ho buat sira ne’e mak TDD deklara katak absolve sira husi kazu partisipasaun ekonomia – Indemnizasaun sivíl,” tenik juiz António Fonseca.
Iha audiénsia julgamentu ne’e, reprezenta Ministériu Públiku mak Prokuradór Jacinto Babo, arguido nain tolu hetan asisténsia legal husi advogadu privadu, Jose Guterres, Pedro Camões no advogadu estranjeiru ida.
Jornalista : Domingos Piedade Freitas
Editór : Francisco Simões
