DILI, 22 janeiru 2020 (TATOLI)- Ministériu Edukasaun, Juventude no Desportu (MEJD) nu’udar na’in ba programa Merenda Eskolár (ME) hamutuk ho Ministériu Agrikultura (MA) no Ministériu Administrasaun Estatál (MAE) sei halo revizaun ba manuál ME ne’ebé la kondis ona ho kondisaun ohin loron.
Manuál ME ne’ebé mak MEJD produs iha V Governu Konstitusionál iha 2013 ne’e agora daudaun iha ona faze revizaun tanba hakarak hadi’a buat barak ne’ebé mak la relevante ona ho kondisaun ohin loron nian liu-liu kona-ba menu hahan nian.
Diretór Nasionál Asaun Sosiál Eskolár (DNASE), Belchior Barros Guera hateten, workshop ne’e sei realiza iha loron 28-29 janeiru 2020. No ninia parte sei konvida dirijente sira ne’ebé kompotente atu bele fo mós sira-nia hanoin ruma relasiona ho prosesu revizaun ba manual ME ne’e rasik.
“Ita sei konvida diretór munisípiu sira, Diretór Administrasaun Finansa Munisípiu, eskola, no Inspetór eskolár atu nune’e bele rona mós sira-nia opiniaun ruma,” Diretór Belchior Barros Guera ba Agência TATOLI, iha nia Gabinete MEJD, Vila Verde, Dili, ohin.
Ezekutivu ne’e akresenta, antes halo revizaun ba manuál ME ne’e iha ona konsultasaun ho Ministériu Saúde (MS), parseiru sira hanesan MeryCorps, OMS (Organizasaun Mundiál Saúde), Care Internasionál e WFP (Programa Ai-han Mundiál, sigla inglés) no CARE Internasionál.
“Parseiru sira ne’e fó apoiu ideia barak oinsá atu hadi’a manuál ne’e atu ba futuru bele mós apoiu di’ak liután labarik ninia kondisaun saúde iha prosesu aprendizajen tanba ne’e mak tinan ida ne’e ministériu relevante tolu ne’e hakarak koko atu hadi’a”.
Notísia relevante: Subsídiu Merenda Eskolár Ba Kada Estudante Mantein Sentavu 0,25
Jornalista : Tomé Amado
Editór : Rafy Belo
