DILI, 22 janeiru 2020 (TATOLI) -Tribunal Distritál Dili (TDD), ohin, hala’o julgamentu ba arguida ER ho arguido JE nu’udar fen-la’en tanba komete krime burla agravada ne’ebé previstu iha artigu 267 Kódigu Penal Timor-Leste.
Tuir Ministériu Públiku (MP) nia akuzasaun katak, ER ho JE nia hahalok halo ema na’in 27 sai vítima tanba sira lohi ema hodi foti vítima sira nia pasaporte no kobra ema ida purvolta $25,00 to’o $50,00 ho promesa falsu atu fasilita ema hirak ne’e ba servisu iha Australia .
“Ha’u hanoin arguido sira hatán loos duni ba Tribunal katak sira rekolla ema lubuk ida nia pasaporte tanba sira serbisu hamutuk ema estranjeiru ida husi Singapura atu fasilita ema sira ne’e ba servisu iha Australia,” hateten Defensora Publika Agostinha de Oliveira, ne’ebé fó asisténsia legal ba arguido kazál ne’e iha TDD.
Defeza ne’e deklara, nia kliente mós ema mak manobra tanba sira nain rua haktuir de’it saida mak ema estranjeiru ida iha Singapura hateten hodi rekolla osan haruka ba ema refere iha Singapura. Mas, realidade to’o agora vítima na’in 27 ne’e seidauk ba Australia.
Iha alegasaun Ministériu Públiku aplika medida koasaun aprezentasaun periódika ba JE no arguida ER aplika Termu Identidade Rezidénsia (TIR) no husi parte defeza mós aseita ho MP kona-ba medida koasaun ne’e.
Audiénsia julgamentu ne’e prezide husi juis singular Edite Palmira, Ministériu Públiku reprezenta prokuradór Luis Hernanio Rangel.
Jornalista : Domingos Piedade Freitas
Editór : Francisco Simões
