DILI, 23 janeiru 2020 (TATOLI) – Ministériu Obra Públika (MOP) liuhusi Institutu Jestaun Ekipamentu (IJE), Eletrisidade Timor-Leste (EDTL) no Diresaun Nasionál Água no Saneamentu (DNAS) no Bombeiru foti solusaun urjente ba inundasaun ne’ebé akontese iha Tasitolu, bairru Kuarentena.
Diretór Jerál MOP, Rui Hernani F. Guterres, hateten Ministru Obra Públika fó ona orientasaun ba Diresaun Nasionál Obra Públika sira liuliu IJE atu hamoos valeta sira ne’ebé nakonu ho lixu.
“Ohin dadeer ami hamutuk ho ministru ba observa direta, ne’ebé ministru haruka kedan IJE hamutuk ho Diresaun Nasionál Água no Saneamentu inklui EDTL hamoos kedan valeta sira iha área Tasitolu to’o mai Kuarentena”, Diretór Jerál MOP afirma via telefónika ba TATOLI, ohin.
Nune’e, Rui Hernani afirma bee halai tuir ona valeta sira bá tasi no ida ne’e mak solusaun ne’ebé presiza halo lalais.
Notísia relevante : Laiha Ezgotu Hamosu Inundasaun iha Kampung Baru
Hodi hatutan ekipa EDTL mós hahú halo identifikasaun ba instalasaun elétrika abitante sira-nian ne’ebé afeta ba inundasaun hodi labele fó risku ba vida vítima sira no ekipa DNAS haree ba instalasaun kanu bee atu abitante sira labele konsume bee fo’er.
Diretór Jerál MOP ne’e salienta, iha área Tasitolu nian ezgotu ka bee dalan sira ladún sufisiente atu bee bele liu, mas daudaun hamoos ona bee dalan sira, ne’ebé bee hahú menus ona.
“Ami analiza hela atu loke luan bee dalan ida iha merkadu Tasitolu nian hodi bee bele halai liu bá tasi”, afirma.
Tanba rezidente barak mós halo uma taka bee dalan, nune’e susar atu bee halai tuir valeta, satán nakonu ho fo’er sira tanba valeta sira ki’ik.
Notísia relevante : SEPS Hala’o Verifikasaun ba Vítima Inundasaun Kuarentena
Rui Hernani garante ho ekipa MOP nian ne’ebé daudaun iha terrenu bele hamenus ona inundasaun ne’ebé afeta tebes ba abitante sira.
“Ita observa inundasaun ne’ebé akontese iha Dili laran ne’e kuaze valeta sira mak intupidu ho lixu sira, ne’ebé ita presiza hamoos bee dalan sira”, hakotu.
Ho inundasaun ne’ebé akontese hafoin udan-boot iha kuarta kalan to’o kinta dadeer, Ministru Obra Públika, Salvador Eugénio Soares dos Reis Pires, tun direta hodi orienta Diretór Jerál Obra Públika, Rui Hernani, no Prezidente Konsellu Administrasaun IJE, José Luis de Carvalho, hodi halo atendimentu emerjénsia ba área afetada ba iha Tasitolu, Kampung-Baru no fatin seluk tan iha kapitál Dili.
Notísia relevante : Família 200-resin iha Tasi-tolu Afetadu ba Inundasaun
Jornalista : Florencio Miranda Ximenes
Editora : Maria Auxiliadora
