DILI, 24 janeiru 2020 (TATOLI) – Maski daudaun ne’e Parlamentu Nasionál (PN) uza rejime duodesimál hafoin orsamentu la pasa, maibé Komisaun Espesializada sira nafatin hala’o fiskalizasaun ba projetu Governu nian iha baze.
“Orsamentu duodesimál ne’ebé prevee ba Parlamentu iha mós ba komisaun sira hodi hala’o atividade fiskalizasaun iha baze kona-ba projetu Governu nian ne’ebé implementa iha tinan 2019 nian”, dehan Segundu Vise-Prezidente PN, Luis Roberto ba Agência TATOLI, sesta ne’e.
Nia informa, atividade fiskalizasaun ne’e normalmente hala’o iha kinta no sesta, maibé bele mós iha sábadu, hanesan daudaun ne’e pedidu balun iha ona meza Prezidente PN.
“Komisaun sira atu ba munisípiu ne’ebé de’it depende ba komisaun ida-idak. Ami Komisaun B mós preparadu ona atu tun ba iha baze liuliu ami foku iha seguransa no defeza ninian. Tanba ne’e semana oin ami sei tun”, katak nia.
Parte seluk, Sekretária Jerál PN, Cedelizia Faria dos Santos, hateten atividade fiskalizasaun Parlamentu uza orsamentu duodésimu kategoria bens no serbisu nian.
“Hosi bens no serbisu ne’e inklui mós viajen lokál no viajen estranjeiru. Orsamentu ne’e ba fulan-janeiru nian ne’ebé hanesan funsionamentu Parlamentu. Karik ita halo viajen lokál ruma no halo transferénsia”, dehan Cedelizia ba Agência TATOLI, foin lalais ne’e.
Nune’e, husi totál orsamentu $1.241.928 kompostu hosi saláriu no vensimentu $484.484, bens no serbisu $662.527, transferénsia públika $78.667 no kapitál dezenvolvimentu $16.250.
Hosi totál orsamentu $1.241.928 ne’e Parlamentu Nasionál hetan $540,227, Gabinete Prezidente Parlamentu hetan $51.864, Bankada Parlamentár sira hetan $78,667.000.
Totál orsamentu $78.667 aloka ba Bankada Parlamentár FRETILIN, CNRT, PLP, PD, KHUNTO, UDT/FM no PUDD.
Komisaun Espesializada sira hanesan Komisaun A (trata asuntu Justisa no Konstitusionál) hetan alokasaun $12.913, Komisaun B (Negósiu Estranjeiru, Defeza no Seguransa) $13.799, Komisaun C (Finansa Públika) 15.153, Komisaun D (Ekonomia no Dezenvolvimentu $11.108.
Nune’e mós, Komisaun E (Infraestrutura) $15.172, Komisaun F (Saúde, Seguransa Sosiál no Igualdade Jéneru) $12.606 no Komisaun G (Edukasaun, Juventude, Kultura no Sidadaia $15.248.
Hosi parte Konsellu Fiskalizasaun Sistema Nasionál Intelijénsia Timor-Leste hetan alokasaun $5.791, Grupu Feto Mulheres Parlamentár Timor-Leste hetan $3.912, Gabinete Sekretáriu-Jerál Parlamentu hetan $7.394, Gabinete Auditoria Interna $4.429, Diresaun Jestaun Finanseira $133.599, Diresaun Rekursu Umanu no Formasaun hetan $256.689, Diresaun Apoiu Parlamentár $9.757, Diresaun Komunikasaun $17.149.
Nune’e mós, ba Divizaun Planeamentu, Monitorizasaun no Avaliasaun $1.192, Divizaun Protokolu $1.910, Organizasaun Globál Parlamentár Kontra Korrupsaun $7.725, Sentru Promosaun Igualdade Jéneru $1.717 Gabinete Estudu Estratéjiku no Jurídiku $2.004, Gabinete Relasaun Internasionál no Kooperasaun $727.000 no Konsellu Konsultivu Fundu Petrolíferu hetan $21.178.
Jornalista: Evaristo Soares Martins
Editór: Xisto Freitas
