iklan

EKONOMIA, HEADLINE

2020, SEFOPE Planeia Haruka Timoroan 10.000 Bá Serbisu iha Austrália

2020, SEFOPE Planeia Haruka Timoroan 10.000 Bá Serbisu iha Austrália

Diretór Nasionál Empregu Esteriór SEPFOPE, Filomeno Soares. Imajen Tatoli/Natalino Costa

DILI, 28 janeiru 2020 (TATOLI) – Diretór Nasionál Empregu Esteriór (DNEE) Sekretáriu Estadu Formasaun Profisionál no Empregu (SEFOPE, sigla-portugés), Filomeno Soares, informa tuir planu, SEPFOPE sei haruka timoroan ho mínimu 5000 no másimu 10.000 bá serbisu iha Austrália.

Timoroan hirak ne’e sei bá liuhosi programa serbisu sazonál (SWP, sigla inglés) no pacific labour scheme (PLS) ho númeru timoroan ne’ebé barak tanba empreza hosi Austrália hatama pedidu barak ba SEFOPE.

“Tinan ida ne’e nia-laran de’it, tuir ami-nian kálkulu, sei haruka timoroan mínimu 5000 no másimu 10.000 hodi bá serbisu iha Austrália liuhosi SWP no PLS nian, tanba tinan ne’e iha demanda barak hosi empreza Austrália, hodi husu timoroan atu bá serbisu tanba sira haree timoroan nia serbisu di’ak no sira gosta hodi rekruta tan”, nia dehan ba Ajénsia TATOLI iha Becora, ohin.

SEFOPE garante númeru timoroan nian atu bá serbisu tanba tinan kotuk barak maka aplika ona vaga SWP ho PLS iha munisípiu sira.

“Ha’u hanoin atu korresponde ba númeru ida ne’e, ami prepara ona ita-nia timoroan sira ne’ebé foin daudaun tuir vaga barak liu iha SWP no PLS nian ne’ebé loke ona iha munisípiu to’o postu, agora balun liu ona vaga ne’e. Daudaun ne’e, sira-nia naran tama ona iha work ready full, hein kuandu pedidu mai entaun ita-nia timoroan sira bele bá ona”, salienta.

Nia dehan Governu kompromete sei kontinua buka dalan atu redús dezempregu iha rai-laran liuhosi lobi sira ho Austrália no ida ne’e hatudu ona pasu pozitivu tanba liuhosi kooperasaun ne’ebé iha, timoroan sira barak agora serbisu iha Austrália liuhosi SWP no PLS.

“Ha’u hanoin katak SWP no PLS fó oportunidade ba timoroan barak, hanesan SWP ami laiha númeru ne’ebé serteza, maibé PLS nian, husi 2019 to’o agora, maske programa ne’e foun maibé timoroan kuaze 100-resin maka bá ona”, hateten.

Tanba ne’e, timoroan sira ne’ebé maka naran tama ona iha work ready full, tenke tuir kursu lian inglés iha sentru formasaun sira, atubele eleva koñesimentu.

“Ami husu ba timoroan sira, agora importante maka otimaliza lian, kapasita an iha lian inglés, nune’e bá serbisu ita bele iha ona koñesimentu língua, atu bá serbisu karik labele hetan difikuldade”, sujere.

Jornalista : Natalino Costa

Editora : Maria Auxiliadora

iklan
iklan

5 Comments

Leave a Reply

iklan
error: Content is protected !!