DILI, 28 janeiru 2020 (TATOLI) – Traballadór timoroan ba programa serbisu sazonál (SWP) iha Austrália, durante tinan 2019, konsege hatama ona reseita hamutuk $6,453,168,00.
“Ita-nia traballadór iha Austrália, tuir dadus ne’ebé maka ami iha durante tinan 2019 de’it konsege hatama reseita hamutuk $6,453,168,00 ba kofre Estadu”, Diretór Nasionál Empregu Exterior Sekretariu Estadu Formasaun Profisionál no Empregu (SEFOPE), Filomeno Soares, informa ba Ajénsia TATOLI iha Becora, ohin.
Nia relata mós, totál reseita ne’ebé maka traballadór sira Austrália hatama mai hahú hosi 2014 hamutuk $17,288,003,67.
“Dezde programa SWP la’o iha 2014, traballadór Austrália hatama ona reseita dólar 17, 288,003,67”, Filomeno katak.
Hodi afirma orsamentu ne’e remesa hosi traballadór sira ne’ebé maka aprezenta ba SEFOPE bainhira fila mai Timor-Leste.
Nune’e mós, traballadór sira la gasta osan, maibé haruka mai família hodi sustenta ekonomia uma-laran nian.
Totál traballadór timoroan ne’ebé mak serbisu iha Austrália dezde 2012 to’o 2019 hamutuk 4.496.
Jornalista : Natalino Costa
Editora : Maria Auxiliadora
