DILI, 29 janeiru 2020 (TATOLI)-Diretór Polítika Kooperasaun Ministériu Saúde, Narcisio Fernandes hateten, étika profisionál ne’e importante tau iha ita-nia oin antes hala’o serbisu
Nia hatutan, banhira ema atu sai médiku ka parteira no enfermeiru, ema ne’e hili dalan ida ne’ebé mak nia rasik deside atu sai ema ne’ebé profisionál.
“Étika profisionál importante tau iha ita-nia oin antes hala’o serbisu. Dalabarak ita simu Kritika katak dalaruma ita-nia atetude simu ema lahó hamnsa,” dehan Narcisio Fernandes banhira hato’o nia diskursu iha serimónia asinatura termu aseitasaun ba rekrutamentu públiku Profisionál Saúde sira hanesan enfermeiru, parteira, farmasista no asistente enfermajem iha HNGV, ohin.
Nia dehan, presiza haree fila fali tanba étika profisionál ne’e haree iha ema ida-nia ko’alia no haree ba ema ida-nia lala’ok sira, to’o haree ba ema nia prestasaun ho nia kualidade. Tanba, nia dehan, serbisu barak mak hein hela médiku, enfermeiru, no parteira sira.
Tanba, tuir nia, profísional saúde sira seidauk to’o iha fatin ne’ebé serbisu optimál atu responde povu nia nesesidade. Ministériu Saúde, nia dehan, kontinua haforsa polítika kontinua hanoin planu ne’ebé mak di’ak hodi serbisu hamutuk ho jestór sira iha HNGV.
“Tanba ita-nia hanoin ba oin katak oinsá mak bele mellora di’ak liután ba implementasaun no mellora di’ak liután ba prestasaun liu husi jere polítika, jere planu no jere estratejia. Ida ne’e mak refleta ba nesesidade no problema ne’ebé mak agora daudaun eziste,” nia dehan.
Hanesan funsionáriu publiku, nia haktuir, ita-nia funsaun publika defini ona ba ita iha dever no direitu. Direitu, nia esplika, mak atu hetan saláriu ne’ebé mak atu sustenta ita-nia moris no hetan fatin ne’ebé dignu hanesan iha HNGV ne’e.
Maibé, nia fo hanoin, nu’udar funsionáriu publiku ida tenke kumpri dever atu tama serbisu tuir oras (08:00). Bainhira oras to’o la’os pasiente sira mak mai hein ita maibé ita mak tenke hein pasiente sira.
“Dever tenke asume iha funsionáriu ida-idak tanba ida ne’e ha’u nia espetasaun ba funsionáriu foun. Katak, asume knaar ho dever tuir lei ne’ebé mak fó mai ita nu’udar funsionáriu públiku. Hala’o serbisu ho profisionál tuir regra no tuir lei funsionáriu públiku nian,” nia esplika.
Jornalista : Felicidade Ximenes
Editór : Rafy Belo
