DILI, 29 janeiru 2020 (TATOLI) – Konsellu Ministru iha reuniaun ordinária kuarta ne’e, aprova Proposta Deliberasaun ne’ebé mak aprezenta husi Ministru Reforma Lejizlativa no Asuntu Parlamentár, Fidelis Manuel Leite Magalhães ho ninia ekipa, kona-ba alterasaun akordu subvensaun no implementasaun entre Millenium Challange Corporation (MCC) ho Governu Timor-Leste.
Ministru Estadu Prezidénsia Konsellu Ministru, Hermenegildo Augusto Cabral Pereira, esplika diploma ne’e ko’alia kona-ba rejime jurídiku administrasaun direita no indireita estadu ninian, tanba afeta ba instituisaun estadu nian, Konsellu Ministru apresia aprezentasaun ne’e no husu atu halo tan konsulta molok atu aprova.
Notísia Relevante: Timor-Leste Asina Ona Akordu Implementasaun MCC
Maski nune’e, alterasaun ba akordu subvensaun hetan duni aprovasaun husi ezekutivu sira.
“Konsellu Ministru aprova duni alterasaun akordu subvensaun no implementasaun MCC, ne’ebé hala’o ho Governu Timor-Leste ba dezenvolvimentu no fasilita implementasaun kompaktu MCC”, nia akresenta.
Programa ida-ne’e espesifikamente hodi responde ba dezafiu ekonómiku iha nasaun, tuir identifikadu ne’ebé hala’o entre MCC no Governu Timor-Leste, hodi kombate kiak no hasa’e kresimentu ekonómiku nasionál ho ninia komponente haat mak hanesan fornesimentu ba bee moos, saneamentu, drenajen, edukasaun, nutrisaun no rezolusaun ba disputa komersiál.
Antes ne’e, Konsellu Ministru fó ona kompeténsia ba Ministru Fidelis hodi asina akordu entre Governu Timor-Leste no MCC.
Liuhosi akordu ne’e, Governu Timor-Leste kontribui ona orsamentu ho valór $650.00 hodi hahú prosesu preparatóriu no MCC kontribui grant ho montante millaun $7,350 hodi hatudu kompromisu MCC no Governu Timor-Leste.
Prosesu Dezenvolve Kompaktu MCC
MCC serbisu daudaun ho Governu Timor-Leste hodi rezolve país ne’e nia dezafiu ekonómiku sira ho konfiansa katak Timor-Leste mak sei sai na’in no halo desizaun bazea ba dadus importante ba dezenvolvimentu sustentável.
Finansiamentu MCC mai husi forma ida hanesan ajuda finanseiru ne’ebé implementa tuir prazu estritu tinan lima nia laran.
Medida husi kompaktu ne’e sei determina bainhira projetu sira identifikadu ona hodi hatan ba Timor-Leste nia impedimentu signifikante liuliu ba kresimentu ekonómiku.
MCC no Governu Timor-Leste hamutuk halo ona análize ida kona-ba impedimentu sira ba kresimentu ekonómiku hodi identifika setór sira no investimentu sira ne’ebé aprezenta oportunidade boot liu ba kresimentu ekonómiku inkluzivu.
MCC no Timor-Leste identifika ona impedimentu ekonómiku sira hanesan menus sustentabilidade no efikasia iha gastu (jestaun iha finansa públika), taxa kámbiu real ne’ebé la kompetetivu, polítika no instituisaun sira ne’ebé fraku atu apoia transasaun sira iha merkadu no rezultadu nutrisionál ne’ebé fraku no falta traballadór altamente kualifikadu (kapitál umanu).
Parseiru rua ne’e sei halo ezaminasaun kompleta no prosesu avaliasaun ba projetu atu avalia viabilidade husi projetu ne’e liga-bá kritéria investimentu MMC nian.
Objetivu mak atu dezenvolve investimentu sira ne’ebé kualidade aas, sustentável orientadu ba rezolve dezafiu ekonómiku ho maneira ida ne’ebé bele estimula kresimentu ekonómiku no reduz kiak.
MCC no Timor-Leste
Timor-Leste inisialmente selesionadu husi Konsellu Administrasaun MCC nian hodi dezenvolve programa “threshold” ida iha dezembru 2016.
Hahú husi tempu ne’ebá, Timor-Leste hatudu ona komprimísiu klaru id aba governasaun di’ak, investimentu ba nia ema sira no garante liberdade ekonómiku, hanesan prova ho “MCC scorecard 2018”.
Iha dezembru 2017, Konsellu Administrasaun vota atu tranzisiona ba programa kompaktu ida bazea ba dezempeñu forte kontinuadu.
Entretantu, MCC nu’udár Estadu Unidu Amérika (EUA) nia ajénsia ajuda externa ida ne’ebé inovativu no independente ne’ebé lidera dadaun luta kontra ki’ak iha nível globál. MCC kria husi kongresu EUA nian, misaun MCC nia mak atu reduz ki’ak liuhusi kresimentu ekonómiku.
MCC fornese ajuda finanseiru iha tempu limitadu hodi promove kresimentu ekonómiku, reduz kiak no fortalese instituisaun sira. Investimentu sira ne’e apoia estabilidade no prosperiedade iha nasaun parseiru sira.
MCC forma parseiru ho nasaun sira ho rendimentu ki’ik, maibé ho de’it hirak ne’ebé kompremetidu ba governasaun di’ak, liberdade ekonómiku no investe iha sira-nia sidadaun sira.
Jornalista: Julia Chatarina
Editór: Xisto Freitas
