DILI, 30 janeiru 2020 (TATOLI) – Governu liuhosi Ministériu Edukasaun Juventude no Desportu (MEJD) hamutuk ho Organizasaun Nasaun Unida ba Agrikultura no Ai-han (FAO, sigla inglés), Ministériu Agrikultura no Peska (MAP) no autoridade lokál sira inaugura tanke bee rua iha Eskola Ensinu Báziku Primáriu Cribas, Manatuto, ohin.
Objetivu hosi programa konstrusaun tanke, atu tulun no kolleita bee hosi uma kakuluk iha tempu udan, atu antesipa bainhira mosu bailoron naruk, tanke bee bele halibur udan-been ho mililitru 50 ba kada tanke.
Udan-been ida ne’e prepara atubele uza ba nesesidade merenda eskolár no sanitasaun eskola Cribas nian, eskola ne’e ho estudante hamutuk 700-resin.
“Ami apoia liuhosi serbisu hamutuk ho autoridade suku Cribas no komunidade hodi harii tanke rua ba estudante sira iha eskola Cribas, nune’e iha tempu bailoron naruk bele responde ba nesesidade estudante sira-nia”, Reprezentante FAO iha Timor-Leste, Paula Lopes da Cruz, afirma iha ámbitu inaugurasaun tanke bee rua iha eskola Cribas.
FAO kompromete sei halo identifikasaun ba área sira iha Timor-Leste hodi konstrui tanke kolleita udan-been, bainhira enfrenta bailoron naruk bele rezolve ona alternativu ne’ebé iha, atubele nesesita nesesidade ema hotu nian.
“Ami promete ba oin ami sei halo identifikasaun ba área sira iha Timor-Leste hodi konstrui tanke kolleita udan-been, karik ita enfrenta bailoron naruk bele rezolve problema bee”, nia dehan.
Iha fatin hanesan, Ministra MEJD, Dulce de Jesus, kongratula inisiativa FAO tanba bele konstrui tanke rua iha eskola Cribas, nune’e nia husu ba estudante sira atu kuidadu, nune’e bele responde nesesidade eskola nian.
“Husu ba estudante no inan ho aman atu kuida fasilidade sira atubele sustenta oan sira iha eskola, nune’e labele lalin tan bee”, governante ne’e hatete.
Nune’e mós, Diretora Eskola Ensinu Primáriu Cribas, Juvita da Costa, sente kontente ba konstrusaun tanke ne’e tanba responde ona nesesidade estudante sira-nian.
Enkuantu, Ministru Agrikultura no Peska, Joaquin José Gusmão dos Reis Martins, reforsa katak programa ne’e la’o tanba serbisu hamutuk ho FAO, tanba haree ba mudansa klimátika ne’ebé kauza hosi bailoron naruk no afeta tebes ba territóriu Timor-Leste.
“Tanba ne’e ohin ita inaugura tanke ne’ebé kolleita udan-been rua atu fasilita estudante sira bainhira tempu bailoron naruk, sira bele uza bee ba sira-nia nesesidade, nune’e maka ita konserva ona udan-been”, hateten.
Konstrusaun tanke rua, hahú iha novembru 2019 no hetan apoiu orsamentu hosi Uniaun Europeia hamutuk rihun $30.
Iha inaugurasaun tanke ne’e hetan partisipasaun hosi Reprezentante FAO iha Timor-Leste, MAP, MEJD, estudante sira, komunidade, autoridade lokál no entidade sira seluk.
Jornalista : Natalino Costa
Editora : Maria Auxiliadora
