MANATUTO, 30 janeiru 2020 (TATOLI) – Ministériu Agrikultura no Peska (MAP) no Organizasaun Nasaun Unida ba Agrikultura no Alimentasaun (FAO, sigla inglés), kompromete sei kolabora hodi kombate peste batar hanaran For Army One.
“Peste ne’e mai hosi Tailándia no Indonézia, ida ne’e afeta ba batar no halo batar mate”, Ministru Agrikultura no Peska, Joaquim José Gusmão Martins, ba jornalista sira hafoin partisipa serimónia lansamentu programa konserva udan-been hosi uma kakuluk ne’ebé hala’o iha eskola ensinu primária Cribas, Munisípiu Manatuto, ohin.
Nia dehan peste ida ne’e foin maka mosu, tanba ne’e MAP seidauk bele halo polítika ruma, maibé sei kolabora ho parseiru sira hanesan FAO atu haree hodi halo intervensaun, maibé atu kombate peste foun presiza liuhosi mapeamentu.
Iha fatin hanesan, Reprezentante FAO iha Timor-Leste, Paula Lopes da Cruz, hateten peste batar tama ona iha Nusa Tengara Timur (NTT), ida ne’e hanesan gafañotu ne’ebé semo.
“Horseik ami simu informsaun, peste ne’e iha ona Timór sorin balun, bele semo kilómetru 100 durante oras 24, ami sei haree hodi tuur hamutuk ho Ministru Agrikultura no Peska hodi responde situasaun ne’e, karik deteta ona tama iha Timor-Leste, entaun bele estraga batar hotu”, dehan.
Tanba ne’e, iha tempu badak nia-laran FAO ho MAP sei tuur hamutuk hodi ko’alia oinsá arranja ai-moruk ruma hodi rega batar sira atu labele mate.
“Peste ne’e iha nia aimoruk ne’ebé maka bele kombate tanba peste ne’e rasik mosu ona iha nasaun hanesan Tailándia no nasaun sira seluk”, konklui.
Jornalista : Natalino Costa
Editora : Maria Auxiliadora
