DILI, 02 fevereiru 2020 (TATOLI) – Tribunál Distritál Dili (TDD), liu husi audiénsia primeira interrogatóriu, sábadu (01/02/2020), aplika pena prizaun preventiva ba arguida FJF ne’ebé deskonfia komete kazu kobransa ilegál ba veteranu balun ho juventude seluk ho kompromisu atu fasilita sira ba servisu iha Australia.
Notísia Relevante : Hala’o Kobransa Ilegál, Polisia Kaptura FJF
Polisia Nasional Timor-Leste (PNTL) hamutuk ho SEFOPE (Sekretaria Estadu Formasaun Profisionál no Empregu) kaptura arguida FJF iha Colmera, Dili, kuarta (29/01/2020), tuku 12:00 Otl, bainhira atu ba foti osan iha Banku Rakyat Indonesia (BRI).
PNTL halo kapturasaun ba arguida FJF tanba halo kobransa ilegál, bosok populasaun no veteranu rezisténsia sira iha Timor laran hodi benefisia nia interese pesoál.
Defeza Fernando da Costa, nu’udar advogadu privadu, katak, TDD aplika medida koasaun ba arguida FJF prizaun preventiva, tanba iha indísiu forte.
“Ha’u hanoin medida koasaun ne’ebé mak aplika husi desizaun TDD iha primeiru instánsia ba kazu burla argravada ba arguida FJF mak prizaun preventiva no ADC mak aprezentasaun periódika kada semana iha sentru polisia,” tenik Fernando da Costa, ne’ebé fó asisténsia legal ba arguida FJF iha Tribunal.
Maske nune’e, nu’udar defeza sei halo rekursu ba desizaun primeira instánsia ho prazu loron 15 nia laran.
Ministériu Públiku akuza arguida FJF ho krime burla agravada ne’ebé mak previstu iha 267 kódigu penal Timor-Leste no alega prizaun preventiva mezmu defeza husu aprezentasaun periódika.
Audiénsia julgamentu ne’e prezide husi singular Juiza, Albertina das Neves, Ministériu Públiku reprezenta husi Prokuradór Benvinda do Rosario, arguida hetan asisténsia legal husi advogadu privadu, Fernando da Costa.
Jornalista : Domingos Piedade Freitas
Editór : Francisco Simões
