DILI, 03 fevereiru 2020 (TATOLI) – Koordenadór Unidade Administrasaun Fundu Petrolíferu Ministériu Finansa (MF), Filipe Nery Bernardo, hateten Coronavirus ne’ebé daudaun sai asuntu globál ne’e, fó mós impaktu ba ekonomia Timor-Leste, liuliu ba projetu sira ne’ebé konstroe hosi empreza Xina.
“Kona-ba virus Corona ne’e ita haree ne’e da’et hosi ema ba ema, maibé iha duni impaktu ekonomia mai Timor-Leste, tanba projetu ne’ebé empreza Xina maka kaer sei afeta, tanba sira-nia ema labele mai no mai mós tenke liuhosi kuarentena. Ne’ebé sei iha impaktu ba projetu ne’e nia implementasaun”, Filipe Nery Bernardo afirma iha ámbitu lansamentu relatóriu trimestrál Fundu Mina-rai hosi Banku Central de Timor-Leste (BCTL) iha edifísiu BCTL, Avenida Bispo Madeiro, ohin.
Filipe Nery Bernardo dehan projetu sira ne’ebé implementa hosi empreza Xina iha Timor-Leste maka hanesan projetu Portu Tibar, no reabilitasaun estrada sira.
“Agora daudaun, ita haree katak viajen hosi Xina labele transit ona iha Singapura, Indonézia mós labele, ne’ebé sei iha impaktu ne’ebé makaas”, katak.
Vise-Governadór BCTL, Venancio Alves Maria, realsa ekonomia Timor-Leste iha tinan tolu ikus (2017-2019) ladún la’o no akontese tan virus Corona ne’ebé hanesan problema mundiál ne’e afeta tebes duni ba ekonomia rai-laran.
“Ita hotu agradese tanba virus ne’e la’ós kona iha ita-nia viziñu hanesan Indonézia, maibé haree ba sasán importadu barak mós mai hosi Xina, maibé sei premature no atu afeta diretamente hosi virus ne’e seidauk iha, maibé atu prova duni ita hein relatóriu hosi trimestre dahuluk iha 2020 nian kona-ba impaktu hosi virus Corona ba ita-nia ekonomia”, dehan Venancio.
Vise-Governadór ne’e salienta, indikasaun inísiu hatudu katak merkadu ASEAN maka reajen negativu ba virus Corona.
Sintoma virus corona nu’udar família husi virus respiratóriu ne’ebé mak bele kauza moras hahú husi inus-been baibain, me’ar no susar atu dada iis to’o moras sériu sira hanesan síndroma respiratóriu médiu oriente no síndroma respiratóriu agudu grave.
Surtu kona-ba moras pneumonia ne’ebé kauza husi virus tipu foun husi virus corona ne’ebé maka relata ona husi sidade Wuhan provínsia Hubei, Xina.
Jornalista : Antónia Gusmão
Editora : Maria Auxiliadora
