Ajénsia Tolu Apoia Implementasaun Programa ME
DILI, 04 fevereiru 2020 (TATOLI) -Programa Merenda Eskolár (ME) ne’ebé hala’o iha eskola sira durante ne’e hetan asisténsia husi ajénsia internasionál sira hanesan Mercy Corps, Care Internasional no Embaxada Estadu Unidu Amérika (EUA).
Informasaun ne’e hato’o husi Diretór Nasionál Finansa Munisípiu (DNFM), Valenti de Fátima Guterres ba Agência TATOLI, iha edifísiu Ministériu Administrasaun no Estatál (MAE), Colmera, Dili, ohin.
“Tan ne’e komesa agora tenke kuidadu jerasaun foun sira oinsá atu moris saudavel. Entaun labarik sira iha eskola tenke abitua ona ho hahán ne’ebé iha nutrisaun,” ezekutivu ne’e dehan.
Tanba ne’e liuhusi apoiu ajénsia sira ne’e nian husik hela lisaun ida nu’udar materia ida ba iha eskola sira. “Ne’eduni esforsu sira ne’e hanesan meius ida ho nune’e ba futuru labarik bele ona abitua ho hahán sira ne’e (nutrisaun)”.
Entretantu, tuir nia, programa ME ne’e mak laiha impedementu entaun atu ativu loloos ne’e iha marsu tinan ne’e. Maibé agora MAE ho MEJD (Ministériu Edukasaun, Juventude no Desportu) hahú servisu ona hodi orienta munisípiu sira hahú prátika daudaun menu sira ne’e hodi hein diploma ne’e kuandu konklui ona fasil atu formaliza maske la’o ho Dotasaun Orsamentu Temporáriu (DOT).
Notísia relevante:MAE Sei Loke Konkursu Aselera Programa ME
Jornalista : Tomé Amado
Editór : Rafy Belo
