DILI, 04 fevereiru 2020 (TATOLI) – Timor-Leste haruka ona lista produtu ba Expo Dubai ne’ebé sei akontese iha 20 outubru tinan ne’e.
“Lista ita manda liuhosi e-mail, iha loron rua liubá, ita hein sira-nia resposta hafoin ita haree”, Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas ba Ajénsia TATOLI, iha Sentru Konvensaun Dili (CCD, sigla portugés), ohin.
Lista produtu ne’ebé manda ona maka hirak ne’ebé iha sertifikasaun, hanesan kafé, mina virjen, mina kamii, artezanatu, mármore no seluk tan.
Nia dehan bainhira sekretariadu Dubai ne’ebá verifika hotu produtu Timor-Leste nian maka foin fó resposta, maibé tempu ne’ebé determina, Timor-Leste sei manda kontentór ba produtu expo nian iha marsu.
Maibé produtu hirak ne’ebé atu lori bá mós iha nia rekizitu katak tenke iha sertifikasaun no parte seluk maka Governu Dubai apoia Timor-Leste ho tipu kontentór, atu transporta produtu sira ho gratuita no fó pavillaun kuaze luan ho metru kuadradu 189 inklui eskritóriu ho gratuita iha Expo Dubai.
Kona-ba orsamentu, nia dehan konserteza sai dezafiu boot, maibé iha tempu badak sei enkontru ho setór privadu sira katak sé sasán sira la bá hotu, entaun lori amostra (sampel) iha expo hodi ema haree, investidór estranjeiru sira laran-monu, bele kontaktu direta ba setór privadu sira Timor-Leste nian.
Antes ne’e, nia dehan iha opsaun barak atu solusiona orsamentu ba Expo Dubai 2020, maski orsamentu ne’ebé prevee iha Gabinete Primeiru-Ministru ho montante millaun $2,1 sumba iha Parlamentu Nasionál.
Notísia relevante : Opsaun Barak atu Solusiona Orsamentu ba Expo Dubai
Entretantu, espozisaun mundiál ne’e, sei partisipa husi nasaun kuaze 192, ne’ebé sei selebra iha Dubai-Uni Emirat Arab, hahú iha 20 outubru 2020 to’o 10 abríl 2021. Área ba expo ne’e kuaze ektare 438 (1.080 ac) iha Dubai Exhibition Centre.
Jornalista : Zezito Silva
Editora : Maria Auxiliadora
