DILI, 04 fevereiru 2020 (TATOLI) – Médiku sira husi Ministériu Saúde (MS) uza materiál saúde ka infrared thermometer hodi observa pasajeiru ró Pacific Explore atu antesipa virus Corona hodi la bele afeta mai Timor-Leste.
“Antesipa virus Corona, ami halo koordenasaun ho ita-nia médiku Ministériu Saúde nian ne’ebé sira servisu daudaun ho Kruz Vermella atu observa ita-nia pasajeiru (kruzeiru Pacific Explore) atu virus ne’e labele afeta mai Timor-Leste”, Diretór Jerál Turizmu, Ministériu Turizmu, Komérsiu no Indústria (MTKI), José Filipe Dias Quintas, afirma iha Portu Dili, ohin.
José Quintas dehan médiku sira observa atu pasajeiru balun ne’ebé isin-manas liu husi grau normál haruka deskansa no hemu bee mak koko fali manas normál bele sai husi portu bá vizita sítiu turístiku sira.
Kruzeiru MV. Pacific Explore, ohin, vizita Timor-Leste ho pasajeiru no tripulante ró hamutuk 2.945, totál turista de’it hamutuk 2.072 no tripulante 873.
Diretór Jerál ne’e adianta kona ba virus corona ne’e presiza duni antesipasaun tanba daudaun ne’e sai issue globál ne’ebé nasaun hotu-hotu preokupa hodi buka meiu atubele prevene afeta ba nia nasaun.
Tuir dadus ne’ebé TATOLI asesu husi médiku Ministériu Saúde katak hafoin halo teste ho materiál infrared thermometer la deteta pasajeiru kruzeiru ne’e infetadu ho Virus Corona, maibé iha de’it pasajeiru balun mak isin-manas liu ona normál ho grau celsius 37 hamutuk 32, mas haruka tuur deskansa no teste fali normál hikas hodi autoriza sai bá vizita fatin turístiku sira iha Dili, Ermera no Liquiçá.
Daudaun ne’e Governu Timor-Leste liuhusi ekipa liña ministeriál asegura no kontrola aeroportu, portu no fronteira marítima atu prevene virus Corona tama Timor-Leste.
Notísia relevante : Antesipa Virus Corona, MTKI Koordena MS Observa Pasajeiru Ró Pacific Explore
Jornalista : Florencio Miranda Ximenes
Editora : Maria Auxiliadora
