AILEU, 06 fevereiru 2020 (TATOLI) – Manuel da Silva, idade 65, veteranu no mós to’os-na’in husi suku Fahiria, Postu Administrativu Aileu Vila, Munisípiu Aileu, ho inisiativa rasik dezde 2007, kuda ona ai-oan iha nia to’os hamutuk rihun 56 no lakohi abandona nia kintál.
“Ha’u ho vontade rasik tanba ha’u-nia mehi ne’e kona duni ba iha ai-laran, ha’u-nia inisiativa kuda ai-oan ne’e la’ós ba Aileu de’it más ha’u hakarak ha’u-nia mehi ne’e ho hanoin ida atu oferese ba ha’u-nia nasaun liuhusi ai sira ne’ebé ha’u kuda, ha’u mós ema veteranu ida, ha’u loron ne’e iha de’it to’os laran, kuandu lia ruma (kultura) maka ha’u-nia família mai bolu ha’u, ha’u sei husu lia ne’e durante loron hira, no kuandu liu loron tolu entaun ha’u la bá, tanba ha’u lakohi abandona ha’u-nia kintál”, Manuel da Silva konta iha Aileu, kuarta ne’e.
Durante kuda ai-oan susar tebes ba nia buka fini rasik, maibé iha 2012, Aileu oan ne’e hetan apoia ai-oan hosi Organizasaun Internasioál Non Governamentál (ONG) World Vision ne’ebé parseria ho Governu Timor-Leste mak Ministériu Agrikultura no Peska (MAP).
Ai ne’ebé Manuel kuda maka, ai-teka (mutin no metan), ai-mahoni, kakeu, ai-saria, ai-samatuku, ai-kanela, ai-fuan sira mak rambutaun, saburaka hamutuk hun 2500, ai-nanas no batar.
“Iha ha’u-nia to’os ai ne’ebé ba tempu badak no tempu naruk iha hotu, tempu naruk maka hanesan ai-teka, ai-mahoni, saria, samatuku, no tempu badak maka hanesan batar, no ai-fuan sira ne’e”, Manuel da Silva dehan.
“Kuda ai sira ne’e ha’u-nia inisiativa rasik, maibé oinsá atu hetan ai-oan sira ne’e, entaun ONG World Vision maka ajuda ai-oan sira ne’e ba ha’u. World Vision la promote osan más promote mak ai-oan, tanba osan ne’e fó mai dala ruma ita gasta tiha, entaun sira uza osan ne’e sosa fali ai-oan hodi fó mai ha’u”.
Nune’e, nia dehan prontu atu fornese ai-oan ou musan ba Governu hodi fó filafali ba komunidade sira. “Ha’u sei ko’alia ho Governu liuliu florestál katak bele sosa ai-musan hosi ha’u hodi fó ba komunidade”.
Manuel da Silva iha membru hamutuk 25, no kada membru ida kuda ai ektare rua, no ai sira ne’e oferese hosi nia, aléinde oferese ai-oan, Manuel da Silva mós fó formasaun ba membru sira ne’e oinsá kuda no konserva ai.
“Ai sira ha’u kuda ne’e benefisia tebes mai ha’u mak hanesan ha’u tesi hodi halo ha’u-nia uma, ha’u fa’an no osan ne’e fó oan ba eskola. Ha’u-nia uma ne’e ha’u sosa de’it maka simentu no kalén, maibé kona-ba ai ha’u la sosa no ai sira ha’u kuda ne’e maka hodi halo odamatan, janela no buat seluk. Ha’u mós fahe ai-oan gratuita ba komunidade no ba ONG balun”, dehan.
Bainhira ekipa Agrikultór Maneja Rejenerasaun Naturál ne’ebé dirije husi World Vision hetan oportunidade hodi vizita Manuel da Silva nia to’os haree katak, katuas ho idade 65 ne’e iha vontade makaas tebes hodi esplika ba to’os-na’in sira hosi munisípiu seluk sobre nia atividade.
Kuaze oras rua nia laran, Manuel da Silva lori to’os-na’in sira ne’e, inklui funsionáriu World Vision, jornalista, komunidade, hale’u nia to’os. Ema hirak ne’e la’o ho kuidadu tanba ai-oan balu foin maka kuda no moris.
Notísia relevante : World Vision Lori Partisipante FMNR Vizita To’os iha Aileu
Iha vizita ne’e, partisipante sira kontente no espresa sentimentu apresia liuhusi hamnasa midar ba Manuel da Silva tanba kuda ai barak no ai mesak oioin de’it, no orgullu liután maka kuda iha rai rasik.
Jornalista : Antónia Gusmão
Editora : Maria Auxiliadora
