DILI, 10 fevereiru 2020 (TATOLI) – Defeza Nelson Borges ba prosesu rekursu administrativa auditoria husi Ministériu Agrikultura no Peska (MAP) husu ba Tribunal Kamara Kontas (TCC-sigla portugés) atu absolve akuzadu na’in tolu husi kazu responsabilidade finanseira sancionatório no reintegratorio.
Notísia Relevante : Tribunal Kontas La Konsege Foti Desizaun Final ba Rezultadu Auditoria Husi MAP
Defeza Nelson Borges ne’ebé hamutuk ho Defensor Públiku; Marçal Mascarinhas no Germano Ramos, fó asisténsia legal ba akuzadu na’in tolu ho inisiál LFM, MM ho JM nu’udar kargu xefia husi MAP, husu Juiz Konselleiru, Deolindo dos Santos, atu absolve akuzadu sira ne’e ba sansaun responsabilidade finanseira sancionatório no reintegratorio.
Kazu ne’e iha relasaun ho osan $14,000,00 ne’ebé lakon iha MAP ne’ebé atu fó apoia ba agrikultór sira iha area rural iha tinan 2011-2012.
Ministériu Públiku reprezenta Prokuradór Pascácio de Rosa Alves, iha nia alegasaun ba kazu kontra akuzadu na’in tolu ne’e mensiona katak, akuzasaun provadu no husu tribunal atu deside tuir nia konviksaun rasik.
Rona tiha alegasaun final, Juiz Konselleiru, Deolindo dos Santos, deside adia hikas audiénsia julgamentu ne’e ba loron 09 marsu 2020, tuku 14:30 Otl, hodi rona leitura sentensa.
Kazu ne’e rejistu ho númeru prosesu 0072/16.TRDIL, 01/2016/TR-37/15 ne’ebé bolu responsabilidade finanseira sancionatório no reintegratorio,.
Jornalista : Domingos Piedade Freitas
Editór : Francisco Simões
