DILI, 10 fevereiru 2020 (TATOLI) – Diretór Nasionál Kuarentena no Bioseguransa , Venâncio Oliveira, hateten Kuarentena presiza mini laboratóriu iha porta entrada Aeroportu Internasionál Nicolau Lobato hodi nune’e bele halo teste diretamente ba iha produtu sira ne’ebé halo apreensaun (foti).
“Ami presiza mini laboratóriu iha aeroportu hodi halo diagnóstiku urjente ba produtu ruma ne’ebé kontaminadu ho virus ruma, tanba bainhira ami lori to’o iha laboratóriu nasionál bele konsidera fahe fali moras ba populasaun”, Venâncio ba TATOLI iha Aeroportu Comoro, ohin.
Tanba ne’e, ho mini laboratóriu Kuarentena bele halo kedas analiza ba sasán sira ne’ebé halo apreensaun (foti) ne’e.
Aléinde ne’e, Kuarentena mós presiza iha ekipamentu hodi proteje an bainhira hala’o serbisu.
“Ami planu ona atu tau iha orsamentu ami-nian rasik hodi halo formasaun no sosa ekipamentu ba ami, ami presiza ekipamentu ne’e hodi proteje an bainhira fó tratamentu ba ema seluk, tanba kauza hosi virus ruma ema sira halo serbisu iha oin maka mate uluk, entaun tenke prevene uluk ita-nia pesoál sira ne’ebé serbisu iha liña oin”, Venâncio Oliveira dehan.
Nia hatutan hatutan preokupasaun sira ne’e tau ona iha planu, maibé agora seidauk bele responde tanba uza hela orsamentu doudesimál, no bainhira osan iha ona maka bele halo buat ruma di’ak ba liuhusi serbí públiku.
Notísia relevante : Kuarentena Halo Apreensaun ba Produtu Ne’ebé Laiha Dokumentu
Jornalista : Antónia Gusmão
Editora : Maria Auxiliadora
